Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Instituto Camões está a seleccionar 15 profesores portugueses para integraren un proxecto de cooperación con Timor Leste destinado á formación de docentes de ensino básico, na área de lingua portuguesa, que ofrece unha remuneración bruta superior a 3500 euros.
Fonte: SIC Notícias
Os órganos públicos da República de Irlanda non contan con suficiente persoal que poida desempeñar as súas funcións por medio da lingua irlandesa, revelou un informe dun departamento gobernamental. A falta de habilidades lingüísticas de irlandés demostra que a administración pública non pode cumprir a norma do Tribunal Supremo da República de Irlanda que establece que todos os cidadáns teñen o dereito a realizar calquera trámite administrativo en irlandés.
Hogano, dous de cada tres escritos xudiciais incorporan xa o éuscaro grazas ás ferramentas de tradución postas a disposición de bufetes de avogados e persoal da Administración de Xustiza. Ademais, e grazas ao proxecto Auzia euskaraz, o corpo de xuíces e fiscais, por boca dos seus máximos responsables na Comunidade Autónoma Vasca confirmaron o seu apoio a esta iniciativa.
Fonte: Noticias de Álava
O Goberno publicará un Real Decreto para incluír nos currículos de ESO e Bacharelato a posibilidade de que os centros escolares ofrezan a materia de Lingua de signos ou braille ou outras materias relacionadas coa comunicación e integración das persoas con discapacidade nestas etapas educativas.
Fonte: RTVE
A palabra "epígrafe" foi a máis consultada en 2014 no dicionario Priberam. Este servizo recibiu máis de 70 millóns de visitas de todo o mundo. Despois de "epígrafe", as palabras máis procuradas en Portugal foron "resiliência" e "paradigma" e no Brasil, que liderou as buscas do dicionario, "rebu" foi a palabra máis consultada, seguida de "ressabiado" e "ascensão".
Fonte: Computerworld
Un grupo de académicos presentou os resultados do estudo "Historia do gaélico na Universidade de Glasgow" que analiza a presenza da lingua gaélica no centro de ensino superior desde o século XV, 450 anos antes de que o gaélico se convertese en materia de estudo na universidade.
Fonte: Stornoway Gazette
Un grupo de mozos universitarios valencianos puxeron en marcha unha revista literaria gratuíta e en formato dixital, titulada Gargots, con publicacións exclusivamente de escritores novos e en lingua catalá.
Fonte: La Vanguardia
Este novo servizo en liña de préstamo de libros dixitais, posto en marcha polo Goberno vasco, dispón dun catálogo de títulos dixitais aberto aos máis de 530 000 socios da Rede de Lectura Pública de Euskadi.
Fonte: EITB
O director de Políticas Lingüísticas do Instituto Nacional de Linguas Indíxenas de México, Antolín Celote Preciado, indicou que o Plan nacional de desenvolvemento prevé incorporar ao sistema educativo o ensino das 68 linguas indíxenas que se falan no país.
Fonte: Almomento
As persoas interesadas en aprender gaélico escocés poderían beneficiarse coa introdución de subtítulos nos programas da televisión pública BBC Alba. A iniciativa recibiu o apoio do sitio web Gàidhlig TV, que promove a aprendizaxe da lingua.
Fonte: The Scotsman
Subscríbase ao boletín
