Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O corso xa é unha das 122 linguas oficiais de Facebook. A rede social, con 1300 millóns de usuarios, fai agora un chamamento aos corsos para que asuman a tradución dos seus contidos. Unha vez rematada a tradución, o corso será, despois do bretón, a segunda lingua rexional de Francia presente en Facebook.
Fonte: Le Figaro
A Consellería de Cultura, Educación e Ordenación Universitaria programa unha ampla oferta de actividades programadas no marco da campaña Nadal en Rede 2014, que promove a Rede de Dinamización Lingüística (RDL) da Xunta de Galicia durante o período de Nadal.
Fonte: Xunta de Galicia
As solicitudes de inscrición de entidades ou de renovación da inscrición no Censo de entidades de fomento da lingua catalá poderanse tramitar electronicamente. A Dirección Xeral de Política Lingüística do Departamento de Cultura modificou a orde para permitir esta nova modalidade de tramitación. A tramitación electrónica facilitará a comunicación coas entidades interesadas e simplificará a achega de documentos.
Fonte: Generalitat de Cataluña
A Concellería de Promoción Lingüística do Concello de Sueca puxo en marcha, un ano máis, varias iniciativas co obxectivo fundamental de promover o uso do valenciano. Unha delas é a publicación dunha axenda que contén as actividades e servizos que se levan a cabo desde este departamento, destinados á cidadanía do municipio, nun formato práctico e manexable.
Fonte: El Periodic
Ante o incremento das queixas no uso da lingua galesa por parte das entidades bancarias, a comisaria da Lingua Galesa, Meri Huws, declarou que iniciará un proceso regulamentario de revisión sobre os servizos que estas entidades ofrecen no País de Gales.
Fonte: Daily Post
Os resultados publicados na última edición da revista Proceedings of the National Academy of Sciences mostran que, ao contrario do que se podería pensar, a influencia internacional dunha lingua mídese principalmente polo seu nivel de relación con outros idiomas, e, en particular, pola súa capacidade de mediación comunicativa entre linguas que doutra forma non conseguirían "falar" entre si.
Fonte: Público
A Fundación Caveda e Nava e SUATEA presentaron un informe á secretaria para a Carta Europea das Linguas rexionais ou Minoritarias do Consello Europeo documento que revisa o desenvolvemento das accións políticas e culturais das institucións para co asturiano entre 2010 e 2013, destacando deficiencias e incumprimentos gobernamentais ao respecto do pautado nesta Carta Europea.
Fonte: Asturnews
Cos obxectivos de promover a euscaldunización do sur navarro e a de facilitar o consumo de produtos locais e impulsar a súa produción naceu o ano pasado a campaña de inverno de Errigora, que consiste na distribución e venda de cestas cheas de artigos gastronómicos da zona. Preto do 25 % da recadación destinarase á melloría da situación do éuscaro no sur de Navarra.
Fonte: Noticias de Navarra
O Consello de Goberno vasco aprobou unha Orde pola que se convocan subvencións, por un importe global de 146 250 euros, para realizar cursos de reforzo en lingua estranxeira en centros privados concertados e en centros públicos de titularidade municipal que imparten ciclos correspondentes ao curso 2014-2015.
Fonte: 20 minutos
O Centro Ramón Piñeiro para a Investigación en Humanidades, dependente da Secretaría Xeral de Política Lingüística da Consellería de Cultura e Educación, acolleu a homenaxe aos tradutores da primeira Biblia completa en galego a partir dos textos e idiomas orixinais de redacción.
Fonte: Xunta de Galicia
Subscríbase ao boletín
