Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O curso comeza no Centro de Linguas da Universidade de Vigo con moitos cambios. A súa nova responsable explica que para o primeiro cuadrimestre a oferta de linguas “enriquécese con cursos innovadores como alemán de supervivencia, un curso de conversa en alemán de nivel A2 ou un obradoiro de iniciación ao alemán a través da música”. Tamén se ofrecerán niveis máis altos de lingua inglesa, que segue a ser a lingua máis demandada.
Fonte: Universidade de Vigo
O Instituto de Letras e Ciencias Humanas (ILCH) da Universidade do Miño, en Braga, acollerá as IV Xornadas ticLINGUAS. A iniciativa pretende debater e fomentar proxectos para o uso das tecnoloxías da información e comunicación (TIC) no ensino e a aprendizaxe das linguas materna ou estranxeira.
Fonte: Braga TV
O popular navegador Mozilla Firefox, utilizado por aproximadamente un 20 % dos internautas de todo o mundo, incorporouse a unha lista crecente de ferramentas de busca que lanzaron unha versión en galés para usuarios de teléfonos intelixentes. Ademais de en galés, o navegador tamén estará dispoñible en armenio, fula, gaélico escocés, éuscaro e islandés.
Fonte: Wales Online
O informe A actualidade da lingua catalá nas portadas da prensa madrileña (2011-2014) analizou durante case tres anos as portadas de La Razón, El Mundo, ABC e El País, os catro principais diarios impresos en Madrid. O traballo pon de manifesto que, se ben o catalán non é un tema habitual nestes medios, cando se trata faise de forma destacada e eminentemente negativa.
Iniciativa polo Asturiano amosou o seu rexeitamento ao trato que se lle dá ao idioma asturiano na celebración do Día de Asturias e que, en opinión deste colectivo, non deixa de ser discriminatorio. Segundo asegura nun comunicado, no cartel do Día de Asturias, que se celebra este ano en Candás, o asturiano está presente a tamaño moito menor que o texto en castelán e cunha cor que dificulta a súa lexibilidade.
Fonte: ABC
As presentadoras de televisión Anne Igartiburu e Reyes Prados protagonizan o terceiro vídeo da campaña do Goberno vasco “Poziktibity”, no que animan os cidadáns a aprender éuscaro e ir aos euskaltegis.
Fonte: Deia
Máis de 30 000 estudantes de Educación Primaria e Secundaria optaron o pasado curso por realizar estudos de lingua francesa, ben en seccións bilingües ou como segunda lingua estranxeira, nos centros escolares da rexión, o que consolida ese idioma como a segunda lingua máis demandada.
Fonte: Murcia.com
O concurso infantil "Os Bolechas e o Sabichón" volverá percorrer as vilas galegas da man do programa de dinamización lingüística FalaRedes, promovido pola Consellería de Cultura, Educación e Ordenación Universitaria por medio da Secretaría Xeral de Política Lingüística.
Fonte: Xunta de Galicia
O guaná, con tan só catro falantes, é unha das linguas indíxenas que corren perigo de desaparecer en Paraguai. O país suramericano afronta o desafío de preservar os seus 20 idiomas orixinarios e non quere perder parte dunha cultura ancestral que historicamente foi deixada de lado polas súas institucións.
Fonte: Yahoo Notícias
O goberno da cidade luxemburguesa de Differdange decidiu pechar a oferta de cursos de lingua portuguesa e deixará máis de 300 estudantes sen clases de portugués. Membros da comunidade portuguesa de Luxemburgo lamentaron esta medida que achacan á necesidade imposta polo Instituto Camões de que os grupos teñan agora un mínimo de dez alumnos.
Fonte: Mundo português
Subscríbase ao boletín
