O Concello de Pamplona presentou o borrador do futuro plan de normalización lingüística, que busca promover o uso do éuscaro na administración e nas relacións coa cidadanía. O documento subliña a responsabilidade institucional de protexer esta lingua e inclúe compromisos para fomentar a aprendizaxe, aumentar o seu prestixio social e asegurar recursos suficientes para a súa implementación. Entre os seus obxectivos figura a creación do Consello Municipal do Éuscaro para supervisar e avaliar as accións.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
21 de xaneiro de 2025
21 de xaneiro de 2025
O Centro de Terminoloxía TERMCAT publicou a versión en catalán das normas UNE-EN ISO/IEC 27000:2021 e UNE-EN ISO/IEC 27001:2023, relativas á xestión da seguridade da información. A norma 27000 define conceptos básicos deste ámbito, mentres que a 27001 establece requisitos para implementar un sistema de xestión de seguridade. Ademais, tamén se traduciu a emenda sobre accións climáticas.
21 de xaneiro de 2025
O Concello de Narón lanzou a guía En Narón, galego viaxeiro dirixida ás persoas que visitan a cidade e desexan iniciarse no uso da lingua galega. Este recurso, dispoñible en galego, español e inglés, ofrece vocabulario e frases prácticas para situacións cotiás, ademais de refráns e expresións populares.
21 de xaneiro de 2025
A décima edición do LGx15, unha iniciativa organizada pola Coordinadora de Traballadores/as de Normalización da Lingua (CTNL) para a difusión de ideas sobre o futuro do galego, celebrouse o pasado 26 de outubro de 2024 en Santiago de Compostela. As intervencións deste evento xa se poden ver na canle de Youtube da CTNL.
20 de xaneiro de 2025
O presidente saínte dos Estados Unidos, Joe Biden, aprobou antes de abandonar a Casa Branca un plan destinado a revitalizar as linguas indíxenas no país. Esta iniciativa busca preservar e promover o uso das linguas nativas, recoñecendo a súa importancia cultural e histórica, e garantindo a súa transmisión ás futuras xeracións.
Fonte: Diari de la Llengua
20 de xaneiro de 2025
A Universidade do Porto lanzou RefLex PLE, unha ferramenta destinada a profesorado, investigadores e estudantado de portugués como lingua estranxeira. Este recurso nace co fin de estandarizar o vocabulario segundo os niveis de competencia definidos polo Marco Común Europeo de Referencia para as Linguas, facilitando a aprendizaxe e o ensino do portugués a falantes non nativos.
20 de xaneiro de 2025
A Residencia Xacobeo acollerá durante o vindeiro mes de marzo o asturiano Inaciu Galán, gañador da estadía na que levará a cabo o seu proxecto de tradución de obras galegas. Trátase da iniciativa que impulsan a Consellería de Cultura, Lingua e Xuventude e a Residencia Literaria 1863 e que, por primeira vez, contará cun escritor da península que traballará nun proxecto de tradución ao asturiano.
Fonte: Xunta de Galicia
20 de xaneiro de 2025
O mercado dos audiolibros medra en España, con máis de 9,3 millóns de persoas que optaron por este formato en 2023. En Galicia, Xerais acaba de lanzar o seu primeiro audiolibro, Pel de cordeiro de Ledicia Costas, mentres que Galaxia presentará tres obras destinadas ao público infantil e novas producións para adultos.
20 de xaneiro de 2025
A Primeira Xornada sobre Política Lingüística nos Municipios abordou as estratexias para reforzar o uso do catalán a nivel local. O conselleiro F. Xavier Vila destacou o papel dos concellos como espazos clave de socialización e propuxo medidas como a creación de plans municipais e incentivos fiscais para fomentar a lingua.
20 de xaneiro de 2025
As entidades locais teñen de prazo ata o 21 de febreiro para presentarse á convocatoria de subvencións para a compra de novidades editoriais en galego en formato físico e para a mellora das coleccións bibliográficas das bibliotecas e/ou axencias de lectura públicas de titularidade municipal.
Boletín
Subscríbase ao boletín
