Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O sitio web da televisión pública en lingua galesa S4C será un dos primeiros en utilizar os novos dominios .cymru e .wales en internet. O director de contidos da canle, Garffild Lloyd Lewis, declarou que "Mudarse aos dominios .cymru e .wales fortalecerá o status da única canle de televisión en lingua galesa do mundo".
Fonte: South Wales Evening Post
As tres universidades galegas ofrécenlle a súa "colaboración institucional" á Xunta de Galicia para realizar unha avaliación "seria, transparente e rigorosa" dos resultados derivados da aplicación do decreto do plurilingüismo nos centros educativos galegos.
Fonte: Europa Press
FAZ Cultura e Cilenis, dúas spin-off xurdidas ao abeiro da Universidade de Santiago de Compostela (USC), veñen de unir forzas para dar forma a un teclado galego para Android. A iniciativa conta co apoio do Servizo de Normalización Lingüística da USC e quere converterse nunha “ferramenta para escribir na nosa lingua e no móbil con total corrección”, informan FAZ Cultura e Cilenis.
Fonte: Código Cero
A campaña “Navega en catalán” da Fundación puntCAT centrou o programa Espai Internet de TV3. Esta campaña ten por obxectivo sensibilizar os internautas cataláns para que configuren os seus navegadores en catalán e así contribúan a aumentar a demanda de contidos nesta lingua. A campaña ten o apoio da Dirección Xeral de Política Lingüística do Departamento de Cultura e de Softcatalá.
O número de empregados públicos da Administración de Xustiza dependentes do Goberno vasco que deben acreditar o coñecemento da lingua vasca crece, pero a presenza do éuscaro nos procesos xudiciais non avanza. Nos xulgados de paz, sobre todo nas zonas con maior porcentaxe de vascofalantes, ou nos rexistros civís fálase e trabállase en éuscaro con relativa normalidade, pero noutros ámbitos xudiciais é mínima.
Fonte: El País
Nunha navegación superficial, a web parece completamente bilingüe castelán-éuscaro. Pero en canto se busca por distintos apartados obsérvase que as informacións en éuscaro quedan relegadas a un segundo plano. “Faltan contidos, non se traducen todas as noticias e cando se fai adoitan publicarse máis tarde có seu equivalente en castelán”, expoñen desde o Consello Navarro do Éuscaro.
Fonte: Noticias de Navarra
Os editores en lingua catalá apostan polo crecemento do sector a pesar das cifras negativas da venda de libros en España, que diminuíu un 9,7 % durante 2013, segundo mostra a Análise do Comercio do Libro en España, presentado pola Federación de Gremios de Editores de España.
Fonte: La Información
Lingüistas como Xosé Manuel Sardiña apuntan que un bo indicativo para medir a saúde do galego na rede é fixarse na súa actividade en Wikipedia. Nela, o galego ocupa o posto 46 en número de páxinas vistas e o 47 en cantidade de artigos escritos neste idioma.
Fonte: Faro de Vigo
A Academia Latina das Artes e Ciencias da Gravación dos Estados Unidos outorgaralles o premio Grammy de carreira a dous artistas lusófonos, o fadista portugués Carlos do Carmo, de 74 anos, e o cantante brasileiro Ney Matogrosso, de 72.
Fonte: Euronews
O Departamento vasco de Seguridade presentoulles aos sindicatos o primeiro Plan de Uso do Éuscaro na historia da Ertzaintza, para afrontar “o reto de dar un servizo policial bilingüe á sociedade vasca”, que prevé pasar dos 25 actuais aos 80 ou 100 ertzainas liberados cada ano para acudir a cursos formativos de éuscaro a partir de 2015.
Fonte: Europa Press
Subscríbase ao boletín
