Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Plataforma Aragonesa Non Falamos Catalán (PANHC) e a Federación de Asociacións Culturais do Aragón Oriental (Facao) organizaron en Alcañiz a celebración do Día da Lingua Aragonesa, acto ao que acudiron unha decena de persoas. Durante a xornada, reivindicaron a aplicación da Lei de Linguas de inmediato e a creación dunha academia aragonesa.
Fonte: La Comarca
Un estudo realizado por Fairfax Media revela que na cidade australiana de Melbourne se falan máis linguas que estados existen no planeta. Un total de 251 idiomas diferentes ao inglés fálanse en toda a cidade.
Fonte: The Age
A comisaria de linguas oficiais do estado canadense de Nova Brunswick, Katherine d'Entremont, presentou o seu primeiro relatorio anual. Nun documento de máis de 90 páxinas, a comisaria insta o goberno a ofrecer un mellor servizo nas dúas linguas oficiais (francés e inglés).
Fonte: ICI Radio-Canada
Unha ducia de entidades culturais e sociais mantiveron unha xuntanza en Compostela para debater e comezar a explorar fórmulas de celebración do Día das Letras Galegas para o vindeiro 2015, considerando "moi desafortunada" e contraria aos principios desta conmemoración a elección de Xosé Filgueira Valverde como figura homenaxeada.
Fonte: Praza Pública
A Consellería de Cultura, Educación e Ordenación Universitaria programa estes días en Ribeira, en Ames e na Bola o concerto de fados en galego "Os sons do vento que pasa". Trátase da nova actividade de verán do programa de dinamización lingüística FalaRedes 2014 da Xunta de Galicia.
Fonte: Xunta de Galicia
A delegada territorial da Xunta en Lugo, Raquel Arias, presentou o VIII Certame de Investigación Lingüística Condado de Pallares, promovido pola Asociación de Amigos do Mosteiro de Ferreira de Pallares, en colaboración co departamento de Cultura e Educación da Xunta de Galicia. O certame, indicou a delegada, busca impulsar “os labores de investigación asociados aos ámbitos da lingüística, a historia, a arte, a arqueoloxía, a antropoloxía, a etnografía e o folclore no antigo territorio que conformou o coñecido Condado de Pallares”.
O presidente de Colombia, Juan Manuel Santos, aprobou un novo programa denominado "Colombia Very Well" co fin de fomentar o bilingüismo español-inglés no país.
Fonte: Colombia Reports
O máis alto tribunal da Unión Europea (UE) anulou a norma da República Federal de Alemaña que establecía que os cidadáns turcos que quixesen reunirse cos seus cónxuxes tiñan que ter coñecementos básicos de alemán.
Fonte: Hurriyet Daily News
O xuíz do Centro de Internamento de Estranxeiros (CIE) de Barcelona ordenou traducir os boletíns que informan os reclusos dos seus dereitos, non só ás linguas oficiais dos seus países, senón tamén ás que falan unha porcentaxe notoria da poboación, como o wolof, o mandinga ou o guxaratí.
Fonte: El Periódico
Un grupo de oito deputados cataláns e valencianos enviaron unha carta ao presidente do Parlamento Europeo, Martin Schulz, para reclamar que se retome o diálogo para que exista a opción de falar catalán no plenario da Eurocámara.
Fonte: La Vanguardia
Subscríbase ao boletín
