Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Servizo para a Garantía dos Dereitos Lingüísticos do Goberno vasco (Elebide) recibiu en 2013 un total de 304 queixas cidadás por vulneración de dereitos lingüísticos, o que supón un crecemento do 2 % en relación co ano anterior. O cambio máis significativo é o aumento de case o 23 % das reclamacións interpostas contras empresas privadas.
Fonte: Deia
O Goberno central, a través do Ministerio do Interior, está adoptando unha serie de medidas para garantir a accesibilidade a colexios electorais nas próximas eleccións ao Parlamento Europeo e por iso prevé que as campañas institucionais informativas de diversos aspectos do proceso electoral se realicen con subtitulado e tradución á lingua de signos.
Oito protestas convocadas pola plataforma Queremos Galego percorrerán as rúas das principais cidades galegas e da bisbarra da Mariña lucense o próximo 17 de maio, Día das Letras Galegas, nunha mobilización "expansiva" que busca "multiplicar" a defensa da lingua galega.
Fonte: Galicia Hoxe
O presidente e o primeiro ministro interinos de Ucraína ofreceron reforzar os dereitos constitucionais de uso da lingua rusa nun esforzo por calmar as protestas separatistas dalgunhas rexións do leste do país.
Fonte: Reuters
O viceconselleiro de Política Lingüística do Goberno vasco, Patxi Baztarrika, destacou o que considera un dos puntos negros no longo camiño da euscaldunización: que só no 13 % dos fogares vascos se fala éuscaro, unha cifra que se eleva ao 20 % se contamos aqueles nos que se escoitan os dous idiomas oficiais.
Fonte: El Correo
O Goberno de Mariano Rajoy quixo deixar claro que un cidadán "non ten dereito” a esixirlle á Administración española que se dirixa a el na súa lingua cooficial e que esta só pode empregarse ante a Administración cando a súa sede “estea situada nunha comunidade bilingüe”.
Fonte: Deia
O historiador Marcos Maceira será o novo presidente da Mesa pola Normalización Lingüística ao ser o único candidato a substituír ao que foi presidente durante 12 anos, Carlos Callón.
Fonte: Galicia Hoxe
Por primeira vez, os carteis e manifestos que a cidade friulana de Udine emprega para a celebración do 25 de abril, Día da Liberación italiana, estarán tamén en lingua friulana.
Fonte: Il Friuli
A Comunidade de Países de Lingua Portuguesa (CPLP) pretende reforzar a influencia e a posición do portugués no sistema mundial como idioma común e lingua materna de millóns de persoas en todo o mundo, declarou nunha entrevista, Gilvan Muller, director executivo do Instituto Internacional da Lingua Portuguesa (IILP).
Fonte: Voz da Rússia
O alcalde do municipio saami de Kautokeino en Noruega, Klemet Erland Hætta, declarou que os refuxiados que cheguen ás súas terras deben aprender a lingua saami e non noruegués para que se poidan integrar na comunidade.
Fonte: The Local
Subscríbase ao boletín
