Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Co gallo do 70 aniversario da edición de Sempre en Galiza, o Consello da Cultura Galega e a Editorial Galaxia prepararon unha aplicación que permite coñecer en profundidade o libro de Castelao, ver a análise que del fixeron especialistas e explorar as propias imaxes que se conservan do político e artista galego.
Fonte: Culturagalega.org
Todos os partidos políticos do Reino Unido deben comprometerse coa mellora do ensino e a aprendizaxe das linguas modernas no Reino Unido, declarou un grupo de parlamentarios británicos.
Fonte: BBC
En declaracións á axencia Angop, a propósito do ensino da historia de Angola desde os primeiros anos de primaria, o docente Paulo Óscar declarou que a introdución das linguas nativas desempeñará un factor preponderante e motivador no coñecemento da historia do país por parte do alumnado.
Fonte: ANGOP
Euskaltzaindia e a revista relixiosa Karmel asinaron un convenio de colaboración para participar conxuntamente en proxectos encamiñados á normalización do éuscaro e da cultura vasca, segundo informou a Academia da Lingua Vasca nun comunicado.
Fonte: ABC
O Servizo de Corrección Lingüística e a Unidade de Corrección do Servizo Editorial do Instituto de Estudos Cataláns (IEC) lanzaron Critèria, un espazo web que contén orientacións e propostas para resolver cuestións tipográficas e dúbidas lingüísticas vinculadas sobre todo coa ortografía e a onomástica e que non dependen estritamente da normativa lingüística, senón que son froito da experiencia profesional.
Tras a controversia xerada o pasado xuño polo estudo d'A Mesa pola Normalización Lingüística que amosaba a lingua propia do país relegada a un 2 % do ensino infantil das cidades e a reacción de, entre outras, a Real Academia Galega, o BNG interpelou o conselleiro de Educación, Jesús Vázquez, para instalo a revelar a información que o denominado decreto do plurilingüismo obriga a recompilar. O conselleiro asegurou que o galego é maioritario en primaria e bacharelato e está próximo a selo na ESO.
A Fundación Rosalía de Castro organizou un acto poético na Casa da Matanza que lembrou a escritora no 129 aniversario do seu pasamento. No acto participaron José Manuel Blanco, Pepe Barro e o presidente da RAG, Xesús Alonso Montero.
Fonte: Sermos Galiza
A Consellería de Cultura, Educación e Ordenación Universitaria leva durante todo o mes de xullo a Vilagarcía de Arousa a mostra itinerante "Nimbos de luz", promovida pola Xunta de Galicia no marco da programación conmemorativa das Letras Galegas deste ano.
Fonte: Xunta de Galicia
Só cinco persoas dominan hoxe o kiliwa, unha lingua indíxena en Ensenada, Baixa California. Por este motivo, o Instituto Nacional de Linguas Indíxenas de México traballa coa comunidade para que os actuais falantes llela ensinen aos seus fillos e netos coa fin de preservar a lingua con maior risco de desaparecer do país.
Fonte: Am de Querétaro
Un grupo de 15 deputados e 79 funcionarios do Parlamento de Timor Leste recibiu o certificado de asistencia do curso de lingua portuguesa, nunha cerimonia que tivo lugar na Asemblea Nacional do país asiático. Segundo declarou o presidente da institución, Vicente Guterres, "é preciso dominar a lingua portuguesa, que é ao mesmo tempo un símbolo de unión entre todos os timorenses e unha garantía da súa supervivencia como país independente".
Subscríbase ao boletín
