Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A comarca de Ondarroa-Markina presenta o maior número de alumnos que seguen os seu estudos en éuscaro en todas as comarcas vascas. Segundo un estudo realizado polo Goberno vasco, as maiores porcentaxes danse nas comarcas de Markina-Ondarroa (97 %), Plentzia-Mungia (96 %) e Gernika-Bermeo (88 %).
Fonte: Diario Vasco
Uns corenta termos foron incorporados recentemente ao catalán froito do labor de fixación terminolóxico do Consello Supervisor do TERMCAT. Estes termos foron normalizados durante o segundo trimestre do ano de 2013 e acaban de saír publicados no Diario Oficial da Generalitat de Cataluña.
Ante a crise internacional xerada arredor de Ucraína, Rusia propón que este país eslavo se converta nun estado federal que se declare "neutral militar e politicamente" e onde o ruso sexa recoñecido coma "segunda lingua oficial", a carón do ucraíno.
Fonte: Nationalia
Unha comunidade do pobo sahtú, dos Territorios do Noroeste de Canadá, ratificou en referendo un acordo de autogoberno con Canadá que lle permitirá dispor de capacidade lexislativa e competencias en lingua, cultura e servizos sociais, entre outros. A Constitución do novo Goberno prevé que as institucións funcionen co inglés e o sahtú como idiomas oficiais. Todos os cidadáns do pobo deline terán dereito a se comunicaren coas institucións gobernamentais en calquera das dúas linguas.
Fonte: Nationalia
China mostra cada vez maior interese pola lingua portuguesa e pretende transformar Macau nun centro de excelencia de ensino da lingua, declarou a académica Carmen Mendes, en Coimbra.
Fonte: Notícias ao Minuto
O borrador da nova lei de linguas oficiais de 2014 do Goberno da República de Irlanda incluirá a supresión da obrigatoriedade de publicar en gaélico irlandés os documentos que anuncien propostas de carácter lexislativo.
Fonte: The Irish Times
A Consellería de Traballo e Benestar convoca probas de avaliación en diferentes competencias clave, entre as que se atopa a comunicación en lingua galega, para o acceso ás accións formativas dos novos certificados de profesionalidade de nivel 2 e 3.
Fonte: Consello da Cultura Galega
A Deputación de Xirona publicou unha web de lingua para difundir o bo uso do catalán que contén a información do Libro de estilo da Deputación, editado en 2011. O libro recolle tanto criterios de presentación de textos, orientacións de estilo e convencións diversas como consellos para axudar na redacción de documentos administrativos e protocolarios.
Co obxectivo de levar a cabo os programas que fomenten o coñecemento e o uso do éuscaro tanto no territorio histórico como en Treviño, o Goberno foral destinará 233 000 euros para a contratación de persoal técnico.
Fonte: El Diario
A CNSE, Confederación Estatal de Persoas Xordas, manifestou a súa satisfacción ante a publicación no BOE do Real decreto 126/2014, de 28 de febreiro, que fixa que as administracións educativas, e no seu caso os centros, poderán ofrecer materias relacionadas coa aprendizaxe da lingua de signos española e a lingua de signos catalá en Primaria.
Subscríbase ao boletín
