Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A asociación do ámbito da educación Klub EduBreizh presentou o seu curso en liña gratuíto e interactivo (ou MOOC, polas súas siglas en inglés) de lingua bretoa. Os participantes poderán adquirir coñecementos básicos deste idioma durante as cinco semanas que dura o curso.
Fonte: France 3
Os equipos de normalización lingüística do instituto Félix Muriel, do colexio Xosé María Brea Segade e do Centro Rural Agrupado (CRA) de Rianxo deron a coñecer a publicación Creadores de Rianxo.
Fonte: Diario de Arousa
A comarca da Rioxa Arabesa xa conta cun documento estratéxico para pór en valor o éuscaro na rexión tras a aprobación das medidas propostas pola Comisión Asesora, que se prolongarán ata o ano 2017.
Fonte: Noticias de Álava
A Universidade de Massachusetts ofrecerá un minor en estudos cataláns a partir do próximo curso. Un minor é unha formación complementaria dentro dos estudos de grao nunha área de coñecemento diferente da que constitúe o núcleo principal dos estudos.
Os Bolechas dan un paso máis na súa aposta por ofrecer novos contidos dirixidos ao público infantil nun formato que reúne diversión e aprendizaxe a partes iguais. Os irmáns lánzanse a aprender inglés e, grazas á Televisión de Galicia, os seus milleiros de fans poderán seguir as súas clases paso a paso e achegarse con eles á nova lingua dun xeito tan divertido como pedagóxico.
Fonte: El Correo Gallego
O Goberno dos Azores (Portugal) promoverá, no ano lectivo 2014/2015, a realización en varias illas de cinco cursos de lingua portuguesa para falantes doutras linguas residentes no arquipélago, anunciou o director rexional, Paulo Teves.
Fonte: Local.pt
O Instituto Internacional da Lingua Portuguesa (IILP) presentoulles os seus proxectos para a futura xestión conxunta da lingua portuguesa á ministra de Educación e ao ministro de Ensino Superior, Ciencia e Innovación de Cabo Verde, así como a outros altos representantes do país. Os proxectos son o Vocabulario Ortográfico Común (VOC) e o Portal do Profesor de Portugués como Lingua Estranxeira (PPPLE).
Apple fixo público que incorpora 24 novas linguas de ditado nos seus sistemas operativos, entre as que estará o catalán. O anuncio farase público durante a presentación dos novos sistemas operativos de Apple, iOS 8 e OS X 10.10 Yosemiti, no marco do Congreso Mundial de Desenvolvedores de Apple.
O Concello de Getxo marcouse a firme meta de impulsar o éuscaro no municipio e, para iso, sabe o importante que é o labor que realizan as distintas asociacións da localidade –na súa maioría de ámbito cultural- que teñen ese mesmo obxectivo. Así, o Consistorio axudaraas con máis de 181 521 euros.
Fonte: Deia
A Consellería de Cultura, Educación e Ordenación Universitaria, representada no secretario xeral de Política Lingüística, Valentín García Gómez, abriu en Santiago a xornada de formación do programa audiovisual de dinamización lingüística "Nós tamén creamos!" deste curso 2013/2014.
Fonte: Xunta de Galicia
Subscríbase ao boletín
