O Concello da Coruña convocou un concurso escolar de blogs escritos en galego dirixido a alumnos de terceiro, cuarto, quinto e sexto de Primaria e de Educación Especial matriculados nos centros da cidade.
Fonte: La Opinión
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
13 de xaneiro de 2014
O sindicato SUATEA esixiulle á Administración asturiana que faga cumprir as resolucións do Consello Escolar do Principado, segundo o acordado na sesión de decembro de 2013, concretamente as catro referentes á lingua asturiana, claves nun novo contexto como é a LOMCE, e que buscan a inclusión da materia de Lingua e Literatura Asturiana dentro do currículo de ensino non universitario.
Fonte: Asturnews
13 de xaneiro de 2014
A escolarización en liñas de valenciano non chega a un terzo do alumnado, pois apenas o 30,4 % dos estudantes de ensino de réxime xeral da Comunidade Valenciana estuda en programas onde a lingua vehicular é o idioma propio. Así consta no anuario «As cifras da educación en España. Curso 2011/2012» que acaba de publicar o Ministerio de Educación.
Fonte: Levante-emv
12 de xaneiro de 2014
Un novo estudo de investigadores da Universidade de Houston, en Texas (EUA), pode axudar no ensino e aprendizaxe de idiomas. O Dr. Arturo Hernández, director do Laboratorio de Bases Neurais do Bilingüismo na universidade, utilizou técnicas de comportamento e métodos de neuroimaxe para investigar a aprendizaxe dunha nova lingua nun cerebro bilingüe. Os resultados mostraron que unha abordaxe “orgánica” centrada nos fonemas en vez de en regras gramaticais, como a que emprega unha nena ou neno cando aprende a se comunicar, pode acelerar en máis dun 20 % o estudo da lingua.
12 de xaneiro de 2014
Dado que a lingua que ten o maior risco de desaparecer no estado mexicano de Chihuahua é a pima, o subsecretario de Educación, Horacio Echavarría, dixo que a estratexia e o plan integral de educación indíxena no estado prevé a creación dunha zona lingüística delimitada (ou niño de linguaxe), para que os poucos falantes transmitan o seu idioma aos máis pequenos e así poder rescatar unha importante bagaxe cultural.
Fonte: El Diario
10 de xaneiro de 2014
O Concello de Pamplona subvencionou en 2013 a dez entidades culturais e artísticas da cidade para a realización e programación de actividades culturais e artísticas en éuscaro. En total, concedéronse os 29 125 euros cos que estaba dotaba a convocatoria.
Fonte: Gente en Pamplona
10 de xaneiro de 2014
O alcalde de Castellón, Alfonso Bataller, asinou un convenio co xefe do Consulado de Romanía na cidade, Radu Catalin Mardare, polo que se autoriza o uso de aulas en centros educativos da cidade para a realización dun curso de lingua, cultura e civilización romanesas durante o presente curso escolar.
Fonte: La Plana al Día
09 de xaneiro de 2014
Egerin, o primeiro motor de busca en internet en lingua kurda, ofrece aos falantes desta lingua unha alternativa ás ferramentas tradicionais que non inclúen este idioma. Grazas a Egerin, agora os kurdos poden facer buscas e escribir blogs na súa lingua e non precisan saber inglés para navegar pola rede.
Fonte: SBWire
09 de xaneiro de 2014
O Parlamento de Iraq aprobou a lei da oficialidade do kurdo que concede a esta lingua o rango de oficial en todas as provincias iraquís.
Fonte: Zawya
09 de xaneiro de 2014
A Consellería de Cultura, Educación e Ordenación Universitaria, a través da Secretaría Xeral de Política Lingüística, apoia a edición do libro cd Nas tardes escuras, co que se rende homenaxe a Rosalía de Castro, interpretando e musicando os seus poemas.
Fonte: Xunta de Galicia
Boletín
Subscríbase ao boletín
