Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Servizo de Normalización Lingüística do Concello de Narón acaba de lanzar unha campaña para felicitar o Nadal en lingua galega entre a cidadanía. A iniciativa ofrece unha serie de materiais, como postais de papel, postais electrónicas e modelos de textos para enviar por SMS, que está dispoñible na páxina web do Concello.
Fonte: La Voz de Galicia
A Xunta de Galicia e o Concello de Lalín conmemoran o 50º aniversario da obra máis lida da literatura galega, Memorias dun neno labrego, do escritor Xosé Neira Vilas.
Fonte: Xunta de Galicia
Faltan só uns días para que culmine o exercicio e centos de asociacións, empresa e consistorios do País Vasco non recibiron aínda a notificación do Departamento de Cultura do Goberno vasco que confirme se lles concederon a subvención solicitada, nin que cantidade percibirán.
Fonte: Deia
O Tribunal Supremo rexeitou un recurso en catalán de Marc Belzunces, que estuda agora a posibilidade de facer un recurso de amparo ao Tribunal Constitucional, ao consideralo un “caso de discriminación dos falantes de catalán” nos tribunais de xustiza españois.
Fonte: E-noticies
O director executivo do Instituto Internacional da Lingua Portuguesa (IILP) garantiu que o Vocabulario Ortográfico Común (VOC) do Novo Acordo Ortográfico estará listo en xullo de 2014.
O Servizo de Normalización Lingüística e mais a Asociación de Empresarios de Redondela poñen en marcha dúas campañas de dinamización e normalización lingüística centradas na época de Nadal, orientadas a dous sectores estratéxicos da actividade económica: a hostalería e o comercio.
Fonte: SNL de Redondela
O galego conta cun novo recurso lingüístico para favorecer e facilitar o uso do idioma na actividade da xustiza. Trátase do primeiro Dicionario Xurídico Galego, unha obra promovida pola Revista Xurídica Galega e pola Secretaría Xeral de Política Lingüística que acaba de publicar Edicións Xerais de Galicia.
Fonte: Xunta de Galicia
A asociación bilingüe Karrikiri, xunto con Karrikaluze e Elhuyar, editan cada ano unha guía cun mapa que inclúe todos os establecementos e servizos públicos nos que se atende en lingua vasca (tendas, bares, despachos…).
Fonte: Noticias de Navarra
A emisora de Radio Nacional de España en Cataluña, Ràdio 4, celebra o seu 35 aniversario, o que a consolida como a radio que leva máis anos emitindo ininterrompidamente en catalán.
Fonte: ABC
Rob Teare sucederá a Rosemary Derbyshire no cargo de director de lingua manesa do departamento de educación e infancia da Illa de Man. Así mesmo, dirixirá a unidade da linga manesa e contará cun equipo de profesores que traballarán con estudantes de idades comprendidas entre os 7 e os 18 anos.
Fonte: BBC
Subscríbase ao boletín
