Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
No que se refire ao uso dos idiomas na docencia da Universidade de Santiago de Compostela neste curso 2013-2014, sen dúbida o dato máis salientable é que o castelán é a lingua en que se imparten o 73,94 % das horas de clase. O galego vehicula o 22,98 % e o inglés o 1,59 %. Francés, portugués, italiano e alemán repártense o restante 1,12 % das horas docentes.
Fonte: O Cartafol Dixital
A resolución do Parlamento Europeo do 11 de setembro sobre Linguas europeas ameazadas de desaparición e a diversidade lingüística na UE significa "un fito" e "un punto de partida" para lograr máis apoios, medios e recoñecemento das linguas minoritarias.
Fonte: Noticias de Navarra
Os traballadores do Concello de San Sebastián formaron un mosaico xigante en apoio a 'Udalean ere euskaraz', unha campaña de comunicación e sensibilización para promover o uso do éuscaro na Administración.
Fonte: Diario Vasco
Persoas de diferentes ámbitos realizaron un chamamento á comunidade euscalduna e vasquista para saír ás rúas de Pamplona o vindeiro 22 de marzo para defender o seu dereito a vivir en éuscaro a «a pesar dos ataques do Goberno de Navarra».
Fonte: Diario Vasco
Representantes de 26 asociacións presentaron un documento de consenso no que reclaman maior presenza da lingua asturiana na programación de Radio Televisión do Principado de Asturias (RTPA).
Fonte: La Nueva España
O portugués é actualmente a cuarta lingua máis falada no mundo, segundo os datos presentados na exposición “Potencial Económico da Lingua Portuguesa” que se exhibe no Parlamento Europeo.
Fonte: Euronews
Na cidade chilena de Temuco terá lugar a terceira marcha para esixir a oficialización da lingua mapuche, o que implicaría o seu uso e ensino nos servizos públicos e centros educativos.
Fonte: Biobiochile
Unha cantante da illa de Man (Reino Unido) aspira a dar un "novo sopro de vida" á lingua manesa, que a Unesco clasificara como extinta. A cantante de 25 anos, Ruth Keggin, declara que a lingua nunca morreu e que a súa recuperación comezou hai xa décadas.
Fonte: BBC
A orde que prepara a Consellería de Educación para regular a autorización do proxecto lingüístico dos centros de ensino de Réxime Xeral desde Infantil ata Bacharelato e Formación Profesional previsto no Decreto de Plurilingüismo reducirá a presenza do valenciano nas escolas de liña en castelán.
Fonte: Diario Información
Desde o ano 2000 celébrase o Día Internacional da Lingua Materna cada 21 de febreiro co obxectivo de impulsar a diversidade lingüística e cultural e o multilingüismo. A data elixida para a celebración conmemora as manifestacións estudantís que tiveron lugar en 1952 en Dacca, capital do actual Bangladesh, e nas que varios participantes morreron en defensa da lingua bengalí para que se recoñecese como un dos dous idiomas oficiais do que daquela era Paquistán.
Subscríbase ao boletín
