Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Un informe de Eurostat, a oficina estatística da Unión Europea, mostra que os estudantes irlandeses teñen un baixo dominio das linguas estranxeiras. Mentres que en países como a República Checa, todos os estudantes do ensino secundario estudan dúas ou máis linguas, un quinto dos estudantes irlandeses non estuda idioma estranxeiro ningún.
Fonte: Independent
O conselleiro de Cultura, Educación e Ordenación Universitaria, Xesús Vázquez, e mais o secretario xeral de Política Lingüística, Valentín García, recibiron na Cidade da Cultura de Galicia os titulares de Política Lingüística dos gobernos do País Vasco e de Cataluña, Patxi Baztarrika e Ester Franquesa, respectivamente. Fixérono no marco da reunión anual de seguimento do Protocolo de colaboración en materia de política lingüística no que participan a Xunta de Galicia, a Generalitat de Cataluña e o Gobierno Vasco-Eusko Jaurlaritza.
A Consellería de Cultura, Educación e Ordenación Universitaria, por medio da Secretaría Xeral de Política Lingüística, continúa a despregar polas localidades da Rede de Dinamización Lingüística (RDL) da Xunta de Galicia o programa de dinamización lingüística “Os Axóuxeres”.
Fonte: Xunta de Galicia
A Junta de Castela e León non quere promover o estudo do galego nalgúns institutos do Bierzo. Este goberno autonómico rachou o acordo que mantiña coa Xunta de Galicia para impartir Lingua e Cultura Galega ao alumnado do Instituto de Ensinos Medio "Europa" de Ponferrada. Por iso, alumnos e pais comezaron xa a mobilizarse e remitiron escritos á dirección do centro, ao colectivo de defensa do galego Fala Ceibe e á Consellería de Educación da Junta de Castela e León mostrando a súa desconformidade con esta medida.
Renfe vai pór como requisito ás empresas que concursen para facerse cos servizos de restauración dos trens que cubran liñas nacionais que o seu persoal fale «con fluidez» catalán, galego e éuscaro -se son necesarios no itinerario que cobre a liña-, ademais de castelán e inglés.
Fonte: La Voz de Galicia
En México, algunhas linguas indíxenas diminuíron a súa transmisión xeracional debido á idea de privilexiar a aprendizaxe do idioma español, asegurou a antropóloga Ludka de Gortari nunha entrevista con motivo do premio do Concurso Nacional de Lendas Indíxenas 2013. A responsable da Unidade de Planificación da Comisión Nacional para o Desenvolvemento dos Pobos Indíxenas (CDI) afirmou que por incrible que pareza o maia é unha das linguas de menor transmisión xeracional.
O corpo británico de policía deberá contratar axentes con destrezas lingüísticas co fin de mellorar a diversidade profesional e os servizos de intelixencia, anunciou o ministro de Xustiza do Reino Unido, Damian Green.
Fonte: The Guardian
O Concello de Carral iniciou unha campaña de promoción do uso do galego coa distribución de carteis e folletos nos edificios municipais para animar a empregar esta lingua a diario e nos que se informa sobre o asesoramento lingüístico que presta o Concello.
Fonte: La Opinión
A Consellería de Cultura, Educación e Ordenación Universitaria promoverá este curso a aprendizaxe do idioma luso en once centros educativos galegos a través do Programa de Lingua e Literatura Portuguesa.
Fonte: Xunta de Galicia
“O éuscaro perdurou en Navarra porque moitos navarros optaron por aprendelo e criar os seus fillos e fillas nesta lingua”, segundo unha das conclusións da tese de doutoramento da filóloga Paula Kasares, lida na Universidade Pública de Navarra.
Fonte: Diario de Navarra
Subscríbase ao boletín
