Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Comisión de Éuscaro de Oarsoaldea, a través dos catro servizos de éuscaro da comarca, vai sortear o pan dun mes en todas as panaderías - pastelerías que participan na iniciativa ‘Eskatu ogia euskaraz! - ¡Pide o pan en éuscaro!’. O vendedor ou vendedora entregará un boleto aos clientes que pidan en éuscaro. Unha vez completado o boleto, deberá depositarse nas furnas que haberá na mesma panadería.
Fonte: Diario Vasco
O director executivo do Instituto Internacional da Lingua Portuguesa, Gilvan Muller de Oliveira, declara que o interese que o Brasil suscitou na Feira do Libro de Frankfurt é un resultado, non só da importancia económica deste país no mundo, senón tamén da expansión internacional do idioma portugués.
Fonte: Operamundi
A medida que o portugués se estende, outros idiomas están seriamente ameazados de extinción no Brasil. Como mínimo, un cuarto das máis de 150 linguas indíxenas do país corre o risco de desaparecer, segundo un estudo divulgado polo Museo Emilio Goeldi.
Fonte: Operamundi
A actividade de dinamización lingüística “As pombas de Carboeiro”, que a Consellería de Cultura, Educación e Ordenación Universitaria promove a través da Secretaría Xeral de Política Lingüística no marco do programa “FalaRedes 2013”, retoma a súa itinerancia por concellos da Rede de Dinamización Lingüística (RDL) da Xunta de Galicia.
Fonte: Xunta de Galicia
Co gallo da vindeira celebración do Día de Defuntos, a Asociación de Funcionarios para a Normalización Lingüística está a promover, un ano máis, o uso do galego no ámbito dos ritos funerarios e das últimas vontades.
Fonte: Consello da Cultura Galega
A asociación de Compostela A Gentalha do Pichel acaba de organizar un novo concurso que ten o "feísmo lingüístico" como protagonista e que está especialmente presente no medio urbano e nas zonas con maior presenza do castelán.
Fonte: Galicia Confidencial
A omisión da denominación Foruzaingoa vulneraría a lexislación sobre o uso do éuscaro nas Administracións Públicas de Navarra, que establece que todos os elementos de identificación dos servizos centrais deben redactarse en bilingüe.
Fonte: Noticias de Navarra
O Hospital Sant Rafael de Barcelona deu un paso na mellora da atención de persoas xordas e incluíu no seu cadro de persoal unha auxiliar clínica con formación en lingua de signos que acompaña os pacientes con discapacidade auditiva durante toda a súa estancia no centro.
Fonte: ABC
Un informe que recomenda a introdución de máis horas de galés nas escolas de fala inglesa do País de Gales levanta polémica nos eidos da educación e a política galesas.
Fonte: Wales Online
Un total de 22 000 estudantes do ensino medio de São Paulo (Brasil) poderán inscribirse para facer cursos intensivos gratuítos de 20 días para aprender unha das tres linguas máis faladas no mundo, o inglés, o español e o francés. A iniciativa estará financiada con fondos públicos.
Fonte: Terra
Subscríbase ao boletín
