Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Ministerio de Educación da India informou de que, segundo a Política Nacional de Educación (NEP), non se lles imporá ningunha lingua aos estados. As tres linguas que os estudantes aprendan serán elixidas polos estados e o propio alumnado, garantindo así a flexibilidade e o respecto ás linguas rexionais.
Fonte: The Pinnacle Gazette
O Tribunal Superior de Xustiza de Cataluña rexeitou os recursos da Generalitat e ratificou a obrigatoriedade de impartir o 25 % das clases en castelán nos centros educativos. A Generalitat argumentaba que o Decreto Lei 6/2022 impide establecer porcentaxes lingüísticas, pero o tribunal considerou que os recursos non xustificaban suficientemente o interese casacional da súa petición.
Desde outubro de 2023, Errenteria desenvolve novas metodoloxías para achegar o éuscaro á cidadanía mediante o proxecto Uler Saioak, que xa formou 28 persoas en comprensión oral. Ademais, púxose en marcha Ulerrizketak, un programa que facilita interaccións en éuscaro cunha persoa de confianza para consolidar a aprendizaxe.
O conselleiro de Cultura, Lingua e Xuventude, José López Campos, acompañado polo secretario xeral da Lingua, Valentín García, presentou no colexio López Ferreiro, en Santiago de Compostela, o programa de dinamización lingüística ‘Falamos +’, no que participan dez centros repartidos polas catro provincias co obxectivo de “impulsar o uso da lingua galega entre a cativada desde a perspectiva do lecer dentro do ámbito escolar”.
O Concello de Leiria implantou un novo servizo de interpretación en lingua de signos portuguesa para mellorar o acceso da comunidade xorda aos servizos municipais. O sistema funciona nos días laborables e permite que as persoas con discapacidade auditiva reciban asistencia na súa comunicación coas institucións locais.
Fonte: Sapo
Miles de persoas manifestáronse en Perpiñán para pedir máis apoio das autoridades francesas ás escolas inmersivas en lingua catalá da Cataluña Norte, que atravesan unha grave crise económica. Baixo o lema "Bressola viva, lingua viva", a marcha percorreu o centro da cidade, onde se escoitaron consignas a favor do ensino en catalán.
Fonte: Diari de la Llengua
O Parlamento de Cataluña aprobou unha moción que propón o catalán como lingua de acollida para as persoas recentemente chegadas a Cataluña de cara a facilitar a súa integración e a igualdade de oportunidades. Ademais, reclama ao Estado un compromiso firme coa normalización do catalán nos territorios de fala catalá e insta o Goberno de Cataluña a garantir a reciprocidade televisiva entre TV3, IB3 e À Punt.
O Departamento de Política Lingüística abriu o prazo para solicitar axudas destinadas á promoción do coñecemento e uso do aranés. As subvencións, que poden cubrir ata o 80% do custo dos proxectos, están dirixidas a persoas físicas, entidades sen ánimo de lucro e empresas, sempre que a iniciativa teña unha vinculación directa co aranés ou co Arán.
A Declaración de Montserrat, promovida pola Rede Vives de Universidades, reafirma o seu compromiso cunha educación superior innovadora, sustentable e inclusiva. Defende unha política multilingüe que combine a vocación internacional coa promoción do catalán e aposta por fortalecer alianzas estratéxicas e proxectos interuniversitarios para incrementar o impacto social e cultural das universidades.
A oferta de materias en catalán nos mestrados das universidades públicas de Cataluña reduciuse a un terzo, mentres que aumentou en castelán e inglés. Nos graos, a presenza desta lingua segue sendo maioritaria, pero tamén diminuíu lixeiramente nos últimos seis anos. A Universidade de Xirona é a que máis utiliza o catalán (84 %), mentres que a UPF é a que menos (45 %), debido á súa vocación internacional.
Subscríbase ao boletín
