Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Iníciase un proxecto novo de aprendizaxe de éuscaro para inmigrantes adultos, que está dedicado á conversación verbal e «desde o comezo, sentados arredor dunha mesa, aprenderemos e utilizaremos palabras e estruturas da vida diaria tendo en conta os intereses dos participantes».
Fonte: Diario Vasco
“Comunicarnos mellor co paciente para darlle unhas mellores atencións de saúde". Esta é a razón pola que o Colexio de Enfermería de Biscaia organiza un curso específico de lingua de signos para profesionais de Enfermería.
Fonte: Noticias Médicas
Un proxecto de recuperación da tradición oral acaba de comezar no Concello de Ponteceso. Trátase dun proxecto, “Ponte na fala”, que ademais ten unha clara compoñente 2.0 pois recollerá todo ese saber tradicional a través da rede, no seu espazo web pontenafala.wordpress.com.
Fonte: Que pasa na Costa
Non ter as habilidades lingüísticas necesarias dificulta a moitos profesionais con experiencia atopar traballo no sector da sanidade en Finlandia. Unha nova enquisa realizada polo Sindicato de Traballadores de Sanidade e Servizos Sociais, Tehy, tamén descubriu que máis dun cuarto dos inmigrantes que traballan en Sanidade din ter sufrido discriminación no posto de traballo.
Fonte: YLE
A Consellería de Cultura, Educación e Ordenación Universitaria, a través da Secretaría Xeral de Política Lingüística, xunto coa Asociación de Funcionarios para a Normalización Lingüística, presentou a campaña “Mil festas máis para a lingua galega”, cuxo obxectivo principal é o fomento social do uso do idioma, nomeadamente nas festas patrimoniais de Galicia.
Fonte: Xunta de Galicia
O español é a segunda lingua materna do mundo, tras o chinés mandarín; a segunda lingua de comunicación internacional, tamén na rede, tras o inglés; e a segunda lingua adquirida nos países de lingua non inglesa.
Fonte: El Referente
A voceira municipal e presidenta do PP en Xixón, Pilar Fernández Pardo, apostou por pór en valor todo o que atinxe á lingua e cultura asturianas, como impulsor dunha industria cultural asturiana capaz de transformar a este sector nun motor de desenvolvemento económico e social, que xere ingresos á rexión.
Fonte: 20 minutos
A conselleira de Educación, Universidade, Cultura e Deporte do Goberno de Aragón, Dolores Serrat, manifestou que o borrador do anteproxecto de Lei de uso, protección e promoción das linguas e modalidades lingüísticas propias de Aragón, ou lei de linguas, suprime “o carácter impositivo” da anterior e “pon énfase” na promoción, protección e conservación destas.
Fonte: 20 minutos
A pesar de que os afroamericanos están habituados a enfrontar todo tipo de desafíos no mercado laboral, un novo obstáculo está agora emerxendo: nalgunhas áreas, os traballadores negros non se consideran cualificados para os empregos porque non son bilingües. En áreas como Texas e Florida, onde a poboación falante de español é grande, prefírense os traballadores bilingües.
Fonte: Atlanta Black Star
Desde o 2007, o portugués é unha das linguas oficiais de Guinea Ecuatorial, xunto ao español e o francés. Desde entón, o país manifestou a súa intención de incorporarse á Comunidade de Países de Lingua Portuguesa (CPLP).
Fonte: Hablemos de Guinea
Subscríbase ao boletín
