Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Escolares de Iparralde e de Zarautz coñeceranse co éuscaro e o deporte como nexo de unión nunha iniciativa que se vén desenvolvendo desde comezos de ano e na que alumnos da localidade de Saint Pierre d’Irube e da Ikastola Salbatore Mitxelena se están comunicando en éuscaro a través do correo electrónico.
Fonte: Diario Vasco
O debate de investidura do novo presidente andaluz será emitido en directo por Canal Sur e, tal e como establece a lei, será integramente traducido á lingua de signos española por un equipo de intérpretes da Federación Andaluza de Asociacións de Persoas Xordas.
Fonte: Diario Signo
A Asociación Checa das Rexións e as embaixadas de Alemaña e Austria na República Checa asinaron un acordo de cooperación para a promoción da lingua alemá co fin de pór freo á perda de interese dos cidadáns checos por esta lingua.
Fonte: Prague Daily Monitor
Un máximo de 50 linguas nativas de Filipinas poderían perderse nun período de 20 anos, segundo informou Artemio Barbosa, antropólogo do Museo Nacional de Filipinas. O Ministerio de Educación aplicará desde comezos do próximo ano académico un novo plan educativo polo que 12 das linguas nativas máis faladas substituirán o inglés e o filipino como linguas de instrución.
Fonte: AFP
A Consellería de Cultura, Educación e Ordenación Universitaria apoia, un ano máis, o Festival Internacional de Cine de Ourense, a importante cita do cinema que chega este ano á súa décimo sétima edición e que se desenvolverá no mes de outubro na cidade das Burgas. Así, a Consellería -a través da Secretaría Xeral de Política Lingüística- vén de presentar o IV Certame de Cinema OUFF Escola 2012, que convoca conxuntamente co Consorcio para o Festival Internacional de Cine de Ourense e a Concellería de Normalización Lingüística do Concello de Ourense en colaboración con Ponte... nas Ondas.
A Consellería de Cultura, Educación e Ordenación Universitaria está a impulsar a prestación conxunta de novos servizos lingüísticos para estender a dinamización social do galego a todo o territorio.
Fonte: Xunta de Galicia
Unha campaña do Concello pretende promover o uso do idioma galego nos nove centros que integran a Asociación Provincial de Ximnasios, que acollen a uns 5000 usuarios, 4000 deles adultos e o resto nenos.
Fonte: El Progreso
O conselleiro de Educación, Cultura e Universidades, Rafael Bosch, anunciou que o Consello Consultivo de Baleares deu o seu visto e prace á libre elección de lingua de ensino na convocatoria do proceso de admisión e matriculación de alumnos.
Fonte: ABC
O Goberno rexional de Murcia deu luz verde a un convenio entre o Ministerio de Educación, Cultura e Deporte e a Consellería de Educación, Formación e Emprego para o desenvolvemento do programa de cooperación territorial ‘Inmersión Lingüística’, cuxo obxectivo é mellorar a fluidez dos alumnos da rexión no uso da lingua inglesa.
Fonte: La Información
O secretario xeral da Alianza Democrática dos Húngaros en Romanía (UDMR), Péter Kovács, declarou que o seu partido espera converter o húngaro nunha lingua oficial dalgunhas zonas de Transilvania. Citou os condados de Bihor, Satu Mare e Salaj (os tres en Transilvania occidental, na fronteira con Hungría) como algúns dos lugares onde o maxiar debería ser oficial.
Fonte: Nationalia
Subscríbase ao boletín
