Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A nova lei lingüística de Ucraína amplía substancialmente o papel do ruso nos territorios onde sexa lingua nativa para, polo menos, o 10 % da poboación. Así, o ruso será oficial en 13 das 27 entidades territoriais, basicamente, as do sur e o este.
Fonte: Rusia Hoy
O director do Instituto Nacional de Linguas Indíxenas, Javier López Sánchez, advertiu que arredor de 64 variantes de linguas indíxenas están en alto risco de desaparición.
Fonte: Vanguardia
Traballadores do Servizo Público de Defensa Contra Incendios Forestais (SPDCIF) da Xunta de Galicia afirman que se dificultaron as tarefas de extinción na loita contra o lume no Barco de Valdeorras (Ourense) polas "deficiencias nas comunicacións" cos medios aéreos, xa que a estes traballadores non se lles pide a lingua galega como "requisito".
Fonte: El Mundo
O coñecemento do éuscaro viuse amplamente reforzado ao longo dos últimos anos, pero tamén avanzou notablemente o seu emprego, principalmente nos ámbitos formais.
Fonte: Noticias de Álava
Os voluntarios da entidade Joves de Mallorca per la Llengua levaron a cabo un acto reivindicativo fronte á Catedral de Palma que consistiu en informar os turistas cal é a lingua propia de Mallorca e a “situación precaria” que padece.
Fonte: ABC
De acordo coa última enquisa sociolingüística da Viceconsellería de Política Lingüística do Departamento de Cultura do Goberno vasco, o número de bilingües de 16 anos ou máis aumentou en 185 600 persoas entre 1991 e 2011. O crecemento foi tan importante que, na actualidade, o colectivo representa xa ao 27 % dentro desta franxa de idade.
Fonte: Noticias de Álava
O novo teléfono intelixente con sistema operativo en tibetano converteuse nun produto moi popular na rexión autónoma do Tíbet tras a súa entrada no mercado en xuño.
Fonte: Spanish People
Moncho Iglesias e Samar Sabat converteron unha antoloxía de 48 textos do palestino Mahmud Darwix no primeiro libro traducido directamente do árabe ao galego.
Fonte: El País
A Consellería de Educación, Formación e Emprego da Generalitat Valenciana vai crear, de cara ao próximo curso, a figura do English Helper ou asistente en clase de inglés na etapa de Educación Infantil. Neste sentido, Educación convocará 329 bolsas de auxiliares de conversación en inglés.
Fonte: El Periodic
O PPdeG anunciou que se une á campaña 'Twitter en galego', que busca promover o emprego desta lingua nas redes sociais atendendo especialmente ao uso entre os máis novos.
Fonte: Galicia Hoxe
Subscríbase ao boletín
