Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Concello de Basauri considera que o éuscaro pode ser un importante elemento de integración para as persoas inmigrantes. Con este obxectivo, o euskaltegi municipal está impulsando un curso no que os alumnos poden iniciarse na lingua vasca á marxe da súa nacionalidade ou idioma.
Fonte: El Correo
O Cartafol é unha publicación gratuíta que se pode descargar desde a páxina web www.cartafol.gl. A partir do 1 de febreiro, xa está dispoñible en iPad e noutros formatos de tabletas electrónicas.
Fonte: Galicia Confidencial
Investigadores do grupo Procesamento da Linguaxe Natural (ProLNat) promoven Cilenis, firma de alicerce tecnolóxico e cunha importante aposta polo software libre cuxo principal obxectivo é o desenvolvemento de produtos baseados nos últimos avances na investigación do procesamento da linguaxe natural e a enxeñería lingüística.
Fonte: Código Cero
O secretario xeral de Política Lingüística da Consellería de Cultura, Educación e Ordenación Universitaria, Valentín García, participou nun acto de homenaxe a Arturo Noguerol, galeguista e xurista ourensán que foi membro da Xeración Nós, das Irmandades da Fala e do Seminario de Estudos Galegos.
Fonte: Xunta de Galicia
A radio Esan Erran Irratia, que emite desde hai 15 anos en lingua vasca en Navarra, viuse “obrigada a interromper a emisión”, deixando unha persoa no paro, como consecuencia dunha “decisión política adoptada hai xa moito tempo, dirixida a asfixiar proxectos en éuscaro”.
Fonte: Noticias de Navarra
A antiga parlamentaria laborista neozelandesa, Winne Laban, demandou que as linguas das illas de Toquelau, Niue e Illas Cook teñan status oficial en Nova Zelandia.
Fonte: TVNZ
A Fundación Universitaria de Irlanda e Canadá ofrece bolsas académicas destinadas a apoiar o ensino da lingua irlandesa nalgunhas universidades canadenses.
Fonte: Careers portal
Un estudo mostrou que a maioría dos cidadáns da Unión Europea están discriminados porque non falan inglés, a lingua na que se desenvolve a maior parte das operacións oficiais comunitarias. Shlomo Weber da Universidade Southern Methodist en Dallas e Victor Ginsburgh da Universidade Libre de Bruxelas afirman que para os falantes comunitarios doutras linguas diferentes ao inglés, as súas linguas nativas teñen un uso limitado nas actividades empresariais, legais e políticas do ente comunitario.
As editoriais galegas publicaron en 2011 un total de 2996 títulos, o que supón un 2,9 % do total de España, dos cales 1855 foron en galego.
Fonte: La Opinión
O novo diario dixital en galego Praza Pública bota a andar a súa primeira edición co obxectivo de “recuperar o espazo perdido polas cabeceiras” en galego no último ano e medio.
Fonte: El País
Subscríbase ao boletín
