Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Iniciativa Cultural da Franxa, organización que reúne o conxunto de asociacións culturais das comarcas aragonesas nas que se fala catalán, criticou que o borrador da nova lei de linguas de Aragón non recoñeza “o dereito dos catalanfalantes” e rexeitaron que a denominación de “aragonés de uso predominante na área oriental” substitúa a de lingua catalá.
Fonte: La Vanguardia
Long Night of Stone é o título co que a Consellería de Cultura, Educación e Ordenación Universitaria difundirá a obra do escritor Celso Emilio Ferreiro no ámbito internacional.
Fonte: Xunta de Galicia
A cadea de supermercados Vegalsa-Eroski acaba de editar a súa revista mensual en galego. A aposta por esta lingua, e polo resto das linguas oficiais do estado español, vén xa de hai tempo, e na súa páxina web ofrécense todos os seus contidos en lingua galega.
Fonte: SNL Redondela
Requirir que os novos inmigrantes falen inglés ou francés a un nivel máis alto mellorará as previsións económicas do país, segundo os ministros; pero hai persoas que temen que esta política favoreza a determinadas nacións.
Fonte: The Guardian
O Servizo Social de Industria desenvolve un proxecto pioneiro de educación cun curso que busca ensinar o idioma e a cultura brasileiras aos haitianos, que respecte a identidade e os coñecementos dese pobo que busca oportunidades no estado brasileiro de Mato Grosso.
Fonte: Expresso MT
Iníciase un proxecto novo de aprendizaxe de éuscaro para inmigrantes adultos, que está dedicado á conversación verbal e «desde o comezo, sentados arredor dunha mesa, aprenderemos e utilizaremos palabras e estruturas da vida diaria tendo en conta os intereses dos participantes».
Fonte: Diario Vasco
“Comunicarnos mellor co paciente para darlle unhas mellores atencións de saúde". Esta é a razón pola que o Colexio de Enfermería de Biscaia organiza un curso específico de lingua de signos para profesionais de Enfermería.
Fonte: Noticias Médicas
Un proxecto de recuperación da tradición oral acaba de comezar no Concello de Ponteceso. Trátase dun proxecto, “Ponte na fala”, que ademais ten unha clara compoñente 2.0 pois recollerá todo ese saber tradicional a través da rede, no seu espazo web pontenafala.wordpress.com.
Fonte: Que pasa na Costa
Non ter as habilidades lingüísticas necesarias dificulta a moitos profesionais con experiencia atopar traballo no sector da sanidade en Finlandia. Unha nova enquisa realizada polo Sindicato de Traballadores de Sanidade e Servizos Sociais, Tehy, tamén descubriu que máis dun cuarto dos inmigrantes que traballan en Sanidade din ter sufrido discriminación no posto de traballo.
Fonte: YLE
A Consellería de Cultura, Educación e Ordenación Universitaria, a través da Secretaría Xeral de Política Lingüística, xunto coa Asociación de Funcionarios para a Normalización Lingüística, presentou a campaña “Mil festas máis para a lingua galega”, cuxo obxectivo principal é o fomento social do uso do idioma, nomeadamente nas festas patrimoniais de Galicia.
Fonte: Xunta de Galicia
Subscríbase ao boletín
