Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Xeorxia prevé a apertura dun centro de cultura e lingua portuguesas en Tiflis como parte do proceso de aproximación á comunidade lusófona. O país caucásico solicitou o estatuto de país observador da Comunidade de Países de Lingua Portuguesa (CPLP).
Fonte: Diário digital
Como resultado da colaboración entre a Área de Innovación Educativa do IES Perdouro e Radio Burela, todos os mércores entre as 5 e as 6 da tarde a emisora de radiofusión transmite Proxecto Neo, un programa que centra o protagonismo nas persoas neofalantes en galego.
Fonte: Crónica 3
Entre o 31 de xaneiro e o 2 de marzo desenvolverase o primeiro Obradoiro de Iniciación á Curtametraxe en Galego, un seminario organizado polo Concello da Coruña e a Escola Oficial de Idiomas desta localidade.
Fonte: Culturagalega.org
A Secretaría Xeral de Política Lingüística, a través do Diario Oficial de Galicia, publicou a convocatoria das probas para a obtención dos certificados acreditativos dos niveis de competencia en lingua galega, Celga 1, 2, 3 e 4.
Fonte: Xunta de Galicia
O Goberno balear non derrogará a Lei de normalización lingüística vixente en Baleares desde 1986, aínda que modificará oito dos seus artigos co fin de asegurar o bilingüismo en todos os ámbitos da Administración.
Fonte: El Mundo
O Concello de Maracena, en Granada, Cruz Vermella e a Asociación Dar el Farah (Casa da Alegría) puxeron en funcionamento clases de árabe que se dirixen, principalmente, aos máis pequenos, co obxectivo de que non esquezan a súa lingua materna e poidan empregala de forma correcta.
Fonte: La Información
As Universidades de Lisboa e Pequín e o Instituto Politécnico de Macau prepáranse para crear unha plataforma para o ensino da lingua portuguesa en China, afirmou en Macau o reitor da Universidade de Lisboa.
Fonte: ANGOP
Canto máis se fala e escribe unha lingua, máis prospera. Porén, cando o medio de comunicación é a rede, esa lingua precisa de tecnoloxía para poder acadar bos índices de uso. Desafortunadamente, moi poucas linguas indias prosperan no espazo virtual debido ao baixo número de cambios tecnolóxicos que obstaculiza o seu uso.
Fonte: The Economic Times
A asociación de estudantes Trabalingua da Universidade de Vigo decidiu poñer en marcha "Falamos?", unha campaña para organizar tándems de conversa entre alumnado galego e estranxeiro de modo que todos poidan ampliar os seus coñecementos doutro idioma. A finalidade é difundir a lingua galega no exterior e facela máis visible a nivel internacional.
Fonte: Universidade de Vigo
A Asociación Cultural Espaituga demanda a presenza da lingua e cultura portuguesas dentro do sistema educativo valenciano “ao mesmo nivel que outras linguas estranxeiras como o francés, o alemán e o italiano”.
Fonte: La Vanguardia
Subscríbase ao boletín
