Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O presidente xeorxiano, Mikheil Saakashvili, reuniuse con 150 participantes do programa estatal "A lingua xeorxiana para o éxito futuro" que anima as minorías étnicas de todo o país a fortaleceren o sentimento de identidade xeorxiana.
Fonte: The Messenger Online
O Goberno balear iniciou o trámite para modificar a Lei de función pública para que a lingua catalá deixe de ser un requirimento e pase a ser un mérito para os procedementos de acceso e provisión na función pública na comunidade autónoma.
Fonte: Libertad Balear
O Observatorio de Dereitos Lingüísticos Behatokia considera, no décimo aniversario da súa fundación, que é “urxente tomar medidas para garantir o dereito a vivir en éuscaro”.
Fonte: El Mundo
As comisións de normalización lingüística de dezaseis centros da Universidade de Santiago de Compostela convocan unha nova edición dos premios á calidade e á excelencia lingüística co obxectivo de fomentar o uso do galego entre o estudantado, ligado ao espallamento da cultura da calidade.
A quinta edición do Partido a prol da lingua galega enfrontará na Estrada a unha selección de mestres contra outra de persoal do concello.
Fonte: La Voz de Galicia
Aínda que as estatísticas mostran que as linguas nativas americanas están ameazadas e o censo dos Estados Unidos revela que queda menos de medio millón de falantes destas linguas en todo o país, houbo algúns avances na súa revitalización e preservación ao longo do ano 2011.
Fonte: Indian Country
O Goberno rexional da provincia autónoma de Tibet anunciou un plan para abrir un total de 251 garderías que ofrecerán unha educación tanto en chinés mandarín como en lingua tibetana.
Fonte: The Economic Times
Non son os únicos que ofrecen clases de éuscaro en Madrid, pero si os que teñen maior número de alumnos e os máis comprometidos co fomento da cultura vasca. Son os argumentos ofrecidos polo presidente de Eusko Ikaskuntza ao entregar o premio ENE-2011 á Euskal Etxea-Fogar Vasco, de Madrid.
Fonte: Diario Vasco
O interese dos pais por que os seus fillos aprendan inglés vai en aumento. E cada vez son máis as familias que optan por modelos lingüísticos de inmersión nesta lingua. De feito, nos últimos catro cursos, desde que se puxeron en marcha os programas plurilingües do Goberno de Navarra, o número de escolares matriculados creceu un 24 %.
Fonte: Diario de Navarra
Garantir unha oferta ampla e de calidade de material educativo que favoreza a aprendizaxe do galego nas aulas. Este é o principal obxectivo da convocatoria de axudas que a Secretaría Xeral de Política Lingüística publica no Diario Oficial de Galicia.
Fonte: Xunta de Galicia
Subscríbase ao boletín
