Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
As mesquitas dos Países Baixos comezan a eliminar gradualmente os sermóns realizados unicamente en lingua árabe. Unha investigación da Universidade de Utrecht mostrou que os musulmáns surinameses son os principais responsables deste cambio.
Fonte: Radio Netherlands
En Xamaica iniciouse a tradución da Biblia á lingua crioula do país. Trátase dunha iniciativa apoiada polos xamaicanos que queren que a súa lingua materna se consagre como lingua nacional, mais criticada por outros, que pensan que aprender e falar inglés debería ser a prioridade.
Fonte: BBC
Os Gobernos de Euskadi e Navarra están analizando a sinatura dun convenio para colaborar no fomento do éuscaro que inclúa, entre outras disposicións, a equiparación dos títulos de éuscaro que expiden ambas as administracións.
Fonte: El País
O grupo parlamentario Compromís presentou unha proposición non de lei nas Cortes na que piden que o valenciano sexa recoñecido como lingua oficial da Unión Europea e aceptado polos Estados membros.
Fonte: La Vanguardia
Un dos retos máis difíciles aos que se enfronta a lingua galega é a superación das limitacións dos campos de uso, restrinxidos ás veces ao doméstico, ao escolar ou ao administrativo. Por este motivo, a Área de Promoción da Lingua do Concello de Lugo quere difundir o emprego do galego en todos os ámbitos da vida e, coincidindo con esta época do ano, deseñou unha campaña aproveitando os agasallos de Nadal que promove o uso da lingua galega no sector do comercio.
A Consellería de Educación e Ordenación Universitaria explicou que promove a adquisición de coñecementos lingüísticos a través de conversacións e un protocolo co municipio de Berlín e a Acádemie de Amiens, respectivamente.
Fonte: Galicia Hoxe
O responsable de Política Lingüística, Anxo Lorenzo, recordou o papel fundamental que desempeñan os colexios oficiais para promover a lingua galega nos seus respectivos ámbitos profesionais.
Fonte: Xunta de Galicia
O portugués ensínase na educación oficial e particular do estado indio de Goa a “arredor de 1300 alumnos”. Nas escolas oficiais, como lingua opcional, conta con “preto de 700 estudantes”.
Un de cada seis alumnos das escolas primarias públicas de Inglaterra fala inglés como lingua adicional á materna. Despois de realizar unha consulta sobre financiamento no ensino, o Goberno está explorando a posibilidade de fixar un límite temporal ao apoio pedagóxico que estes alumnos reciben en lingua inglesa.
Fonte: BBC
En Gales inciouse unha batalla sobre que versión do nome do país debe figurar ao final dos futuros sitios web. Os defensores da lingua galesa avogan polo nome en galés ".cymru", e non ".wales", porque a razón principal de conseguir un dominio para Gales era crear unha comunidade de falantes de galés na rede. Porén, o ministro principal de Gales, Carwyn Jones, declarou recentemente que apoia o domino exclusivamente en inglés ".wales".
Subscríbase ao boletín
