Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Departamento de Cultura, Arte e Lecer de Irlanda do Norte realizou a enquisa "Actitudes dos cidadáns cara á lingua irlandesa" que revelou que os habitantes desta zona do Reino Unido deberían ter máis oportunidades para aprender irlandés.
Fonte: U TV
A Consellería de Cultura, Educación e Ordenación Universitaria difunde o legado de Celso Emilio Ferreiro en Pontevedra a través dunha exposición itinerante que estará ata o 11 de maio na biblioteca nodal da cidade.
Fonte: Xunta de Galicia
A Consellería de Cultura, Educación e Ordenación Universitaria presentoulle ao alcalde o proxecto da Rede de Dinamización Lingüística que a Xunta de Galicia puxo a andar en setembro de 2010 e que a día de hoxe conta xa con preto de 120 entidades adheridas.
Fonte: Xunta de Galicia
O programa de promoción do galego FalaRedes, impulsado dende a Consellería de Cultura, Educación e Ordenación Universitaria para as entidades locais adheridas á Rede de Dinamización Lingüística (RDL) chegou nos seus primeiros 45 días a máis de 50 concellos.
Fonte: Xunta de Galicia
O secretario xeral de Política Lingüística representou á Consellería de Cultura, Educación e Ordenación Universitaria na presentación pública dos actos conmemorativos do 50 aniversario das Letras Galegas na sede da Real Academia Galega (A Coruña).
Fonte: Xunta de Galicia
Escolares de Iparralde e de Zarautz coñeceranse co éuscaro e o deporte como nexo de unión nunha iniciativa que se vén desenvolvendo desde comezos de ano e na que alumnos da localidade de Saint Pierre d’Irube e da Ikastola Salbatore Mitxelena se están comunicando en éuscaro a través do correo electrónico.
Fonte: Diario Vasco
O debate de investidura do novo presidente andaluz será emitido en directo por Canal Sur e, tal e como establece a lei, será integramente traducido á lingua de signos española por un equipo de intérpretes da Federación Andaluza de Asociacións de Persoas Xordas.
Fonte: Diario Signo
A Asociación Checa das Rexións e as embaixadas de Alemaña e Austria na República Checa asinaron un acordo de cooperación para a promoción da lingua alemá co fin de pór freo á perda de interese dos cidadáns checos por esta lingua.
Fonte: Prague Daily Monitor
Un máximo de 50 linguas nativas de Filipinas poderían perderse nun período de 20 anos, segundo informou Artemio Barbosa, antropólogo do Museo Nacional de Filipinas. O Ministerio de Educación aplicará desde comezos do próximo ano académico un novo plan educativo polo que 12 das linguas nativas máis faladas substituirán o inglés e o filipino como linguas de instrución.
Fonte: AFP
A Consellería de Cultura, Educación e Ordenación Universitaria apoia, un ano máis, o Festival Internacional de Cine de Ourense, a importante cita do cinema que chega este ano á súa décimo sétima edición e que se desenvolverá no mes de outubro na cidade das Burgas. Así, a Consellería -a través da Secretaría Xeral de Política Lingüística- vén de presentar o IV Certame de Cinema OUFF Escola 2012, que convoca conxuntamente co Consorcio para o Festival Internacional de Cine de Ourense e a Concellería de Normalización Lingüística do Concello de Ourense en colaboración con Ponte... nas Ondas.
Subscríbase ao boletín
