Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Centro de Cooperación Internacional en Educación ofrecerá unha licenciatura en lingua e cultura portuguesas na provincia chinesa de Hainan. Os estudantes terán a oportunidade de cursar o último ano da licenciatura en Portugal e poderán escoller entre dúas vías de especialización: Xestión Turística e Tradución e Interpretación do portugués ao chinés e viceversa.
Fonte: CNoticías
O número de nenos que teñen o inglés como lingua materna son agora minoría en máis de 1600 escolas de Inglaterra. Os novos datos mostran que case un millón de nenos das escolas inglesas non teñen o inglés como a súa primeira lingua. O punxabi é o primeiro idioma máis frecuente destes alumnos.
Fonte: Mail Online
Un comité da Cámara dos Lores británica afirmou que todos os nenos deberían aprender linguas estranxeiras na escola primaria e secundaria. O secretario de Educación do Reino Unido, Michael Gove, é tamén partidario de aprender linguas desde os cinco anos de idade.
Fonte: BBC
Un experto na lingua falada de Jersey, Tony Scot-Warren, espera que a tradución do Facebook á lingua nativa da illa poida axudar a revivir a lingua. Facebook está xa dispoñible en 71 linguas e aspira a engadir o dialecto normando da illa (ou "jerriais") a esta lista.
Fonte: BBC
A música rock en galego é protagonista do novo ciclo de concertos que organiza o Concello de Pontevedra, en colaboración coa Sala Karma, que reunirá a cinco grupos. Segundo o concelleiro Demetrio Gómez, esta actividade «é fundamental porque permite levar a normalización lingüística a onde é difícil chegar dende as institucións, a esa franxa de idade entre os 16 e os vinte e algo anos».
Fonte: La Voz de Galicia
A asociación Softcatalà presentou en Barcelona o programa “Catalanizador” para os sistemas de Microsoft Windows, que permite de forma sinxela cambiar a súa configuración para poder utilizar o catalán como lingua principal nestes contornos informáticos.
Fonte: Finanzas
A Universidade das Illas Baleares (UIB) emitiu un escrito a favor da lingua catalá en que, “como institución oficial consultiva para todo o que se refire á lingua catalá”, de acordo co Estatuto de Autonomía, manifesta “a súa preocupación e a súa desconformidade” a raíz das últimas actuacións do Goberno balear en materia lingüística.
O Concello de Lugo disporá dunha ordenanza específica para "avanzar no proceso de normalización lingüística e animar os cidadáns a utilizar o idioma galego sen complexos en todas as facetas da súa vida diaria", informou o tenente alcalde e responsable municipal de Cultura e Turismo, o nacionalista Antón Bao.
Fonte: De Luns a Venres
A Deputación de Guipúscoa preguntará aos contribuíntes se desexan relacionarse exclusivamente en éuscaro coa institución foral durante a campaña da declaración da renda, co que elaborarán un censo “voluntario” de vascofalantes.
Fonte: ABC
As persoas xordas signantes disporán dunha nova ferramenta que lles facilitará comunicarse, máis ou menos, con outras persoas que non coñecen as linguas de signos.
Fonte: Diario Signo
Subscríbase ao boletín
