Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O proxecto Praza Pública empezará a comunicar como xornal dixital en xaneiro. Está aberto a quen queira colaborar, coa idea de trazar estratexias cooperativas co resto dos medios que seguen comunicando en galego ou teñen previsto facelo.
Fonte: El País
O sindicato asturiano do ensino SUATEA fixo unha declaración na que pedía “unha radiotelevisión para o Principado de Asturias” de calidade, ben xestionada e ao servizo das necesidades da sociedade e non de intereses partidistas. SUATEA entende que a RTPA debe ter un “importante valor educativo e cultural” e debe desempeñar un papel importante “no fomento e normalización da lingua e cultura asturianas”.
Fonte: Asturnews
Defensores da lingua laz en Turquía solicitaron oficialmente ao Goberno turco que cree un instituto para a protección e estudo do laz, unha lingua caucásica ameazada que precisa de axuda gobernamental urxente para sobrevivir.
Fonte: Today's Zaman
O patuá macaense, unha lingua crioula de base portuguesa influenciada polo cantonés e o malaio, está considerada pola UNESCO como "seriamente ameazada". Estímase que unicamente un pequeno grupo de persoas pode falar a lingua en Macau e, se cadra, uns poucos centos nas comunidades macaenses do estranxeiro.
Fonte: AFP
O responsable de Política Lingüística, Anxo Lorenzo, participou na Estrada no acto de constitución da Irmandade da Sanidade Galega (ISAGA), unha iniciativa promovida pola Asociación de Funcionarios para a Normalización Lingüística que busca promover a extensión do galego no ámbito sanitario.
Fonte: Xunta de Galicia
A promoción social da lingua galega inicia unha nova etapa coa constitución da Rede de Dinamización Lingüística. Esta iniciativa, pioneira no fomento do galego desde as administracións públicas, quedou formalmente constituída nunha sesión celebrada na capital de Galicia.
Fonte: Xunta de Galicia
Euskaltzaindia inaugurou o seu novo Centro de Investigación do Éuscaro Luis Villasante, que vai reunir todos os servizos e grupos de investigación que ten a Academia da Lingua Vasca en Guipúscoa.
Fonte: Diario Vasco
A plataforma aragonesa “Non Falamos Catalán” iniciou unha recollida de sinaturas para que as modalidades lingüísticas da zona oriental de Aragón sexan declaradas Ben de Interese Cultural da comunidade na súa acepción de bens culturais inmateriais.
Fonte: Aragón Liberal
Investigadores rusos e da cidade canadense de Saskatoon están tentando salvar unha lingua doukhobor que está a piques de desaparecer en Canadá. A lingüista Veronika Makarova, que abandonou Rusia para salvar esta lingua, estima que hai menos de 50 persoas que aínda a falan na provincia canadense de Saskatchewan.
Fonte: The Vancouver Sun
Un dos principais problemas de Perú son as diferenzas no rendemento educativo. Por este motivo, a ministra peruana de Educación, Patricia Salas O'Brien, defendeu que é importante que as poboacións de Perú e América Latina non sintan que as súas linguas indíxenas son un estigma de pobreza e exclusión. Co fin de resolver esta situación, o Ministerio de Educación peruano ten como obxectivo impulsar a educación bilingüe e a normalización das linguas indíxenas.
Fonte: Univision
Subscríbase ao boletín
