Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Aínda que o inglés segue sendo a lingua máis falada entre o persoal directivo dos catro continentes, o chinés estase convertendo non só na lingua máis falada do mundo senón tamén na chave mestra para o mercado asiático, líder mundial da produción industrial.
Fonte: Manager Online
Os cidadáns da Unión Europea teñen agora a posibilidade de atopar un notario que fale a súa lingua en calquera país de Europa. O Comité de Notarios da Unión Europea (CNUE) e a Comisión Europea puxeron en marcha o directorio www.notaries-directory.eu que permitirá aos cidadáns atopar un notario en Praga, por exemplo, que fale portugués co obxectivo de que lles axude cos negocios transfronteirizos como a adquisición de bens inmobiliarios ou operacións de liquidación de sucesións, entre outros.
O secretario xeral de Política Lingüística, Anxo Lorenzo, presentou os obxectivos e estratexias polos que aposta o seu departamento para promover o fomento social do galego. Fíxoo no congreso As Linguas e Culturas do Camiño de Santiago de Compostela: Presente e Futuro, no marco dunha mesa redonda sobre a promoción dos idiomas minoritarios desde as institucións rexionais europeas.
Fonte: Xunta de Galicia
A aplicación está destinada a persoas que están aprendendo éuscaro, así como a tradutores, escritores, profesores ou estudantes, que busquen a máxima corrección nos seus textos, segundo informou Ideateca.
Fonte: Europa Press
Os alumnos da Fundación Vinjoy, coa colaboración da Universidade de Oviedo, editaron un DVD musical en lingua de signos. Cancións para ver, nas que se mesturan a interpretación teatral coas letras signadas por estudantes.
Fonte: El Comercio
O catedrático da Universidade de Santiago de Compostela e responsable do ciclo de divulgación científica ConCiencia, Jorge Mira, recibiu o Premio da Crítica de Galicia 2011 na modalidade de investigación por liderar o traballo ‘A importancia da similitude interlingüística e o bilingüismo estable cando dúas linguas compiten’, realizado con Luís Seoane e Juan Nieto.
A diversidade lingüística e cultural do Camiño de Santiago protagonizou un congreso na capital galega que congregou numerosos expertos na materia de diversos puntos de Europa.
Fonte: Xunta de Galicia
A versión máis recente de Kindle, o dispositivo de lectura de libros dixitais, xa ten incorporado o dicionario da lingua portuguesa, froito dun acordo asinado entre a empresa portuguesa Priberam e Amazon.com.
O Instituto Vasco Etxepare participou na edición de 2011 da Feira das Linguas de Londres, unha das máis importantes feiras lingüísticas de Europa, onde o éuscaro compartiu expositor con linguas de todo o mundo.
Fonte: Eitb
Con motivo do festival nacional da cultura gaélica escocesa (Am Mòd Nàiseanta Rìoghail), presentouse un novo recurso dirixido a persoas interesadas en aprender a lingua gaélica. LearnGaelic.net ofrece aos usuarios orientación gramatical, unha ferramenta terminolóxica e información sobre a cultura gaélica co fin de reforzar o dominio e o coñecemento desta lingua.
Fonte: Highland News
Subscríbase ao boletín
