Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Ante o acelerado proceso de desaparición das linguas iumanas, cucapá, kiliwa, paipai e kumiai, os únicos catro idiomas indíxenas vivos do estado mexicano de Baixa California, diversas institucións académicas asinarán un convenio de colaboración para o seu rescate.
Fonte: El Universal
O Servizo Municipal de Educación do Concello da Coruña organiza Palabras contadas, unha actividade dirixida ao alumnado de 5º e 6º de primaria que ten entre os seus obxectivos potenciar a comprensión e a expresión oral en lingua galega ou aprender a falar en público.
Fonte: Concello da Coruña
Coincidindo co Día Europeo das Linguas, a Fundación Elhuyar presentou a versión para móbil de cinco dos seus dicionarios.
Fonte: EITB
A finais deste curso a Universidade de Vigo porá en marcha un Servizo de Tradución e Interpretación, pioneiro nas universidades galegas. Deste xeito dáse resposta a unha demanda da comunidade universitaria para poder traducir textos e traballos de investigación, documentos oficiais e contar con intérpretes nunha Universidade cada vez máis internacionalizada.
Fonte: Universidade de Vigo
Lexicógrafos da Comunidade dos Países de Lingua Portuguesa (CPLP) encóntranse reunidos en Cabo Verde para definir a metodoloxía destinada a consolidar e unificar os dous vocabularios da lingua portuguesa existentes publicados en Portugal e Brasil.
Fonte: SIC Notícias
Moitas escolas británicas están comezando a impartir cursos de inmersión en linguas estranxeiras. Segundo un voceiro da organización das escolas de inglés como segunda lingua, os programas de inmersión proporcionan a maneira máis simple e rápida de garantir o dominio dunha lingua.
Fonte: PR Urgent
O Consello Escolar de Euskadi deu o visto e prace ao decreto do Goberno vasco no que se establece que os alumnos que estuden máis do 50 % das materias en éuscaro quedarán exentos de acreditar títulos sobre o coñecemento desa lingua nos procesos de selección da Administración pública.
Fonte: El Correo
O responsable de Política Lingüística, Anxo Lorenzo, presentou en rolda de prensa o congreso As Linguas e Culturas do Camiño de Santiago de Compostela, que terá lugar na capital de Galicia entre os días 21 e 22 do próximo mes de outubro. O secretario xeral aproveitou a conmemoración do Día Europeo das Linguas, que se celebra desde hai 10 anos cada 26 de setembro, para dar a coñecer o programa e os obxectivos desta iniciativa.
Fonte: Xunta de Galicia
A iniciativa de comunicación Sermos Galiza, que busca recursos de todo tipo para o lanzamento dun semanario en papel e dun diario dixital en galego, presentouse xa en Santiago, no Festigal e na Coruña. Agora estanse a preparar xa novas sesións en Vigo (o 29 de setembro) e en Santiago (o 4 de outubro).
Fonte: Código Cero
O español é a segunda lingua estranxeira máis estudada, despois do inglés, nos centros de educación primaria e secundaria de Francia e Suecia, segundo os datos difundidos pola oficina de estatística da Unión Europea (Eurostat). O español tamén é o segundo idioma estranxeiro máis estudado na educación primaria nas escolas do Reino Unido.
Fonte: European Pressphoto Agency
Subscríbase ao boletín
