Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O proceso de ensino e aprendizaxe das linguas nacionais angolanas ten como principal beneficiario a poboación rural que vai permitir a redución do número de analfabetos existentes no país e significará un apoio para a loita contra a pobreza.
Fonte: AngolaPress
O portugués é a sexta lingua do mundo máis utilizada nos negocios, segundo o estudo da Bloomberg sobre as linguas estranxeiras máis usadas neste sector. O estudo analizou 25 linguas do mundo, excluíndo o inglés. O español queda en cuarto lugar nesta clasificación de ámbito internacional.
Fonte: Boas Notícias
A policía de Irlanda do Norte e un grupo de organismos do ámbito do deporte recibiron a petición de apoiar o plan que aspira a crear 1000 novos falantes de irlandés antes de 2015. A ministra de Cultura, Caral Ni Chiulin, pedirá a personalidades prominentes e á cidadanía en xeral compromiso para falar irlandés con fluidez antes da data límite.
Fonte: Yahoo News
Un plan para rebaixar o actual status do árabe como lingua oficial alimenta o clima de tensión en Israel.
Fonte: Aljazeera
Un total de 40 persoas integra o curso para a formación de intérpretes de linguas indíxenas no estado mexicano de Puebla, no que se impartirán cinco linguas: náhuatl, mazateco, otomí, popoloca e totonaco. O obxectivo é garantir o dereito dos indíxenas a contar cun intérprete para defenderse.
Fonte: TV3 Puebla
O Ministerio de Comercio, Industria e Turismo de Colombia anunciou un plan para ensinar inglés a 7000 provedores de servizos turísticos de todo o país ata 2015 coa esperanza de facer de Colombia un destino turístico de renome mundial.
Fonte: Colombia Reports
A Universidade de León iniciou o seu «Curso de preparación de lingua e cultura españolas» no que preto de 120 alumnos estranxeiros que estudarán este ano no centro mellorarán a súa comprensión do castelán.
Fonte: Diario de León
O Servizo de Normalización Lingüística do Concello de Narón pon en marcha o 2º Concurso de Monólogos "Que me dis!!". Este concurso, que ten como obxectivo promover o emprego da lingua galega nas novas tecnoloxías entre a cidadanía, consiste na gravación de monólogos, tanto en formato vídeo coma audio, que serán colgados na páxina web do concello.
Fonte: Concello de Narón
O portavoz do partido Foro Asturias de Siero, Eduardo Martínez Llosa, pediulle ao Concello un orzamento maior para a rotulación toponímica, para a que este ano se conta cunha subvención do Goberno de Asturias de 1892 euros.
Fonte: Asturnews
O secretario do Goberno, Tzvi Hauser, invitou os cidadáns a presentar formas de conservar e promover a lingua hebrea. A invitación estendeuse a través da páxina de Facebook da oficina do primeiro ministro, ademais de noutras páxinas web. Hauser liderará un equipo especial que buscará xeitos de conservar e fomentar o idioma hebreo e analizará as suxestións presentadas.
Fonte: Israel National News
Subscríbase ao boletín
