Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Aínda non se chegou a un consenso sobre as linguas orixinarias que deben impartirse nas unidades escolares de Bolivia. As autoridades educativas instruíron que as provincias apliquen a lingua nativa que predomina na zona, incluído o quechua. Porén, organizacións sociais pensan que se debe dar prioridade ao ensino das linguas orixinarias do departamento de Santa Cruz.
Fonte: Los Tiempos
Un mozo brasileiro de 15 anos adapta o iPhone 4S, da empresa norteamericana Apple, á lingua portuguesa. O aparello está dispoñible só en inglés, francés e alemán.
Fonte: Ciência Hoje
Nos tempos actuais de crise, un grupo de traballadores está a gozar de prosperidade grazas aos bos índices da economía xermana: os profesores de lingua alemá. Os centros do Instituto Goethe de toda Alemaña están a rexistrar un forte incremento de estudantes de Grecia e España, dous dos países máis castigados pola crise na zona do euro.
Fonte: FT
Coñecida comunmente como a lingua orixe do árabe e o hebreo, a antiga lingua aramea conta aínda con falantes e está prosperando nalgunhas zonas de Iraq. Hoxe en día, coa crecente estabilidade da rexión kurda do país, o arameo está rexurdindo na zona. Das 30 000 persoas estimadas que falan un dialecto do arameo no mundo, a maioría vive no Kurdistán iraquí.
Fonte: The Wall Street Journal
Os poetas de Galicia teñen un novo espazo autoxestionado onde dar a coñecer os seus traballos coa creación do blog As escollas electivas.
Fonte: Valmiñor.info
A campaña a prol dos medios en lingua galega acaba de lograr o seu primeiro éxito. “Vitaminas para o galego” conseguiu recadar máis de 4000 euros a través de internet en menos dun mes dende a súa presentación.
Fonte: Galicia Confidencial
O Departamento de Educación convocou para o presente curso escolar cinco concursos en éuscaro co fin de fomentar a creatividade, a expresión e as competencias lingüísticas nesta lingua do alumnado navarro.
Fonte: Diario de Navarra
O Tribunal Constitucional decidiu manter en suspenso a lei autonómica do aranés, que pretende establecer como ‘preferente’ a lingua aranesa no Val de Aran (Lleida) aínda que na comarca existen tres linguas oficiais en igualdade de condicións.
Fonte: La Voz de Barcelona
Os nenos inuit están medrando con novas tecnoloxías en continua evolución mais algúns pais temen que as habilidades lingüísticas non poidan adaptarse ao ritmo imposto por estas tecnoloxías. Por este motivo, un pai da cidade canadense de Iqaluit decidiu crear un xogo educativo en liña e un software para nenos na lingua inuit.
Fonte: The Vancouver Sun
O observatorio dos dereitos lingüísticos Behatokia, creado por Kontseilua, cumpriu en 2011 dez anos. Fundado para velar polos dereitos dos falantes de éuscaro, Behatokia presentou recentemente en Bilbao un balance da última década (2001-2010) e resumiu que neste tempo a normalización do éuscaro non sufriu “grandes avances”. Durante estes anos, o observatorio tratou 9514 casos, dos que destacan as 8535 queixas rexistradas.
Fonte: Deia
Subscríbase ao boletín
