Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Os profesores José Domingo Dueñas e Francho Nagore presentan na Facultade de Ciencias Humanas e da Educación, un novo título de posgrao da Universidade de Zaragoza. Trátase do Diploma de Especialización en Filoloxía Aragonesa, que se impartirá no campus de Huesca.
Fonte: Radio Huesca
O conxunto monumental da Alhambra e o Xeneralife converteuse no primeiro de España en ofrecer un servizo gratuíto de signoguías para persoas xordas a través dun dispositivo Ipod con pantalla táctil que reproduce vídeos explicativos en lingua de signos española e subtitulados.
Fonte: Europa Press
A editorial virtual Meubook (http://www.meubook.com) vén de publicar o Dicionario fraseolóxico bilingüe castelán-galego, a meirande obra de fraseoloxía comparada da península ibérica, cun corpo de máis de 8500 expresións, frases feitas e xeitos de dicir en lingua castelá e ao redor de 25000 en galego.
Fonte: Galicia Hoxe
Despois de noventa anos, estudosos da Universidade de Chicago sacaron á luz un dicionario de 21 volumes da lingua da antiga Mesopotamia e os seus dialectos babilónicos e asirios que se extinguiron hai 2000 anos. Estas linguas preserváronse en táboas de arxila e inscricións de pedra que foron descifradas tras un intenso traballo de dúas décadas.
Fonte: The New York Times
A lingua italiana é cada vez máis popular nos Estados Unidos xa que o número de estudantes desta lingua ten experimentado un crecemento notable nos últimos anos. Segundo a Asociación de Linguas Modernas, organización que se ocupa do ensino de linguas estranxeiras, en 2009, o número de inscricións en cursos de lingua italiana ascendeu a 80.752 nos Estados Unidos, un 3 % máis respecto ao ano 2006.
Fonte: NewNotizie
Un novo estudo estatístico realizado en Canadá mostra que en 2006 un 55 % dos nenos canadenses nados en familias inmigrantes ten a mesma lingua materna que as súas nais, fronte a un 41 % na mesma xeración en 1981.
Fonte: The Star
O programa de dinamización lingüística Bocaberta premia o talento dos máis novos nas Letras Galegas a través do concurso de microrrelatos da actividade A guerra das bruxas, que organiza a Secretaría Xeral de Política Lingüística en colaboración coa Editorial Rodeira.
Fonte: Xunta de Galicia
Desde os seus inicios, EiTB asumiu o compromiso de impulsar o emprego e a normalización do éuscaro entre a sociedade vasca.
Fonte: EiTB
O Centro de Linguas Modernas da Universidade de Santiago ten aberto o prazo de matrícula para inscribirse nos cursos de verán intensivos de idiomas, pensados sobre todo para os alumnos que o curso próximo teñen prevista unha estancia no estranxeiro no marco dalgúns dos programas de intercambio universitario, aínda que non é exclusivo para eles.
Fonte: El Progreso
Escola Valenciana clausurará as Trobades d’Escoles en Valencia 2011 en Ibi e Relleu tras percorrer distintas localidades das Comunidade Valenciana, nas que se reivindicaron o ensino en valenciano e o uso social da lingua vernácula.
Fonte: Diario Crítico
Subscríbase ao boletín
