Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Nenos e nenas de entre 2 e 6 anos son o público principal da Semente, un centro educativo que abre as súas portas en Compostela. O proxecto ten unha dupla vertente e funciona pola mañá como centro educativo e pola tarde como ludoteca, partindo sempre dun traballo en galego.
Fonte: Culturagalega.org
A emisora en asturiano Radio Sele viuse obrigada a desmontar a súa antena e deixar de emitir tras recibir unha orde do director provincial da Xefatura de Comunicacións, que pertence ao Ministerio de Industria, Turismo e Comercio de España. Con esta decisión, o Goberno central pecha a única radio que usa o asturiano no 100% das súas emisións.
Fonte: Asturnews
Está en marcha unha campaña en Letonia para adoptar o ruso como segunda lingua oficial. Prevese que esta reciba un importante apoio, dado que case a metade da poboación do país é de orixe rusa. No caso de que se oficialice, o ruso pode converterse tamén en lingua oficial da Unión Europea.
Fonte: Euronews
Segundo as enquisas realizadas nos Estados Unidos, existen uns 300 000 cidadáns cheroquis, mais poucos de entre os menores de 40 anos teñen competencia oral na lingua cheroqui. Os esforzos para revitalizala incluíron a creación dun dicionario electrónico con máis de 10 000 entradas e a fundación dunha escola de inmersión lingüística.
Fonte: Physorg
O pasado 27 de outubro presentouse Tempos Dixital, a nova presenza na rede da revista Tempos Novos, un dos poucos medios escritos en galego que aínda resiste.
Fonte: Galicia Hoxe
O proxecto Praza Pública empezará a comunicar como xornal dixital en xaneiro. Está aberto a quen queira colaborar, coa idea de trazar estratexias cooperativas co resto dos medios que seguen comunicando en galego ou teñen previsto facelo.
Fonte: El País
O sindicato asturiano do ensino SUATEA fixo unha declaración na que pedía “unha radiotelevisión para o Principado de Asturias” de calidade, ben xestionada e ao servizo das necesidades da sociedade e non de intereses partidistas. SUATEA entende que a RTPA debe ter un “importante valor educativo e cultural” e debe desempeñar un papel importante “no fomento e normalización da lingua e cultura asturianas”.
Fonte: Asturnews
Defensores da lingua laz en Turquía solicitaron oficialmente ao Goberno turco que cree un instituto para a protección e estudo do laz, unha lingua caucásica ameazada que precisa de axuda gobernamental urxente para sobrevivir.
Fonte: Today's Zaman
O patuá macaense, unha lingua crioula de base portuguesa influenciada polo cantonés e o malaio, está considerada pola UNESCO como "seriamente ameazada". Estímase que unicamente un pequeno grupo de persoas pode falar a lingua en Macau e, se cadra, uns poucos centos nas comunidades macaenses do estranxeiro.
Fonte: AFP
O responsable de Política Lingüística, Anxo Lorenzo, participou na Estrada no acto de constitución da Irmandade da Sanidade Galega (ISAGA), unha iniciativa promovida pola Asociación de Funcionarios para a Normalización Lingüística que busca promover a extensión do galego no ámbito sanitario.
Fonte: Xunta de Galicia
Subscríbase ao boletín
