A Real Academia Galega culmina o ano dedicado a Luísa Villalta traducindo ao hindi oito poemas da súa obra Papagaio. A tradución, realizada por Vikash Kumar Singh, amplía o acceso á súa literatura a unha das maiores comunidades lingüísticas do mundo.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
20 de decembro de 2024
20 de decembro de 2024
A Arlef (Axencia Rexional para a Lingua Friulana) e outras entidades puxeron en marcha o primeiro exame de friulano que permitirá obter a certificación do nivel B, ou “intermedio”, segundo o Marco Común Europeo de Referencia para as Linguas, aprobado mediante Resolución do Consello de Europa en novembro de 2001.
Fonte: Friuli Oggi
19 de decembro de 2024
O conselleiro de Cultura, Lingua e Xuventude, José López Campos, participou na presentación das novidades de Xabarín.gal, unha nova plataforma de entretemento da CRTVG de contidos en galego dirixidos aos máis pequenos e pequenas coa que colabora o Goberno galego co obxecto, segundo salientou, “de incrementar o emprego da nosa lingua entre as xeracións máis novas”.
19 de decembro de 2024
Donostia acolle un acto de recoñecemento a entidades públicas e privadas pola súa xestión do éuscaro
O Goberno vasco organizou en Donostia un acto no que se recoñeceron os progresos de entidades públicas e privadas na promoción do éuscaro. Grazas ao novo sistema de avaliación aprobado en 2023, ademais dos certificados Bikain engádense outros distintivos como os diplomas Harrobi, co obxectivo de fomentar o uso do éuscaro no ámbito laboral, para contribuír ao benestar, á competitividade e á identidade internacional das empresas.
19 de decembro de 2024
O Consello Navarro do Éuscaro revisou o proxecto de orzamentos de Euskarabidea para 2025, que inclúe un incremento do 11,6 % nas partidas para fomentar a lingua. O plan reforza programas propios e o apoio ás entidades sociais e locais, especialmente no ámbito educativo, cultural e tecnolóxico, e dáselle prioridade ao público novo. Tamén se impulsa a atención bilingüe na Administración e o uso do éuscaro no sector socioeconómico, así como os medios de comunicación.
19 de decembro de 2024
Este curso de iniciación á lingua galega, organizado pola UNED de Pontevedra en colaboración co Concello de Ribadumia, está dirixido a público xeral sen coñecementos previos de galego. As sesións, de carácter presencial, desenvolveranse entre os meses de xaneiro e maio de 2025.
Fonte: O Portal da Lingua Galega
18 de decembro de 2024
Un informe recente revela unha preocupante caída no número de estudantes en Escocia que estudan linguas modernas europeas desde 2001. Este descenso atribúese a cambios nas políticas educativas e á falta de prioridade no ensino de idiomas, o que xerou inquietude sobre as habilidades lingüísticas das novas xeracións e a súa conexión cultural con Europa.
Fonte: The Scottish Sun
18 de decembro de 2024
A Biblioteca do Congreso dos Estados Unidos albergou a presentación do Gran Dicionario Monlam da Lingua Tibetana, unha obra lexicográfica de 223 volumes que axudará a preservar o idioma tibetano fronte ás políticas de asimilación cultural promovidas por China.
Fonte: Radio Free Asia
18 de decembro de 2024
Como cada 18 de decembro, as Nacións Unidas conmemoran en todo o mundo o Día Internacional da Lingua Árabe, un dos idiomas oficiais deste organismo internacional. O lema deste ano é "Lingua Árabe e IA: Avanzando na innovación mentres se preserva o patrimonio cultural".
Fonte: United Nations
18 de decembro de 2024
O Concello de Picassent asinou por primeira vez un convenio coa Academia Valenciana da Lingua para promover o uso e coñecemento do valenciano no municipio. O acordo inclúe accións en toponimia, comunicación e promoción lingüística, así como asesoramento ao persoal municipal e ás asociacións locais. Ademais, prevese o apoio á biblioteca municipal e outras iniciativas conxuntas para fomentar a lingua.
Boletín
Subscríbase ao boletín
