Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O líder da tecnoloxía mundial Google incorporou a lingua escrita cheroqui ao seu repertorio de linguas. De igual maneira que o resto de linguas que inclúe Google no seu motor de busca, agora todos os falantes de cheroqui que poden ler e escribir na súa lingua poden facer buscas de calquera tema na rede de alcance mundial.
Fonte: Your Industry News
Un novo informe do Instituto Asiático da Universidade de Melbourne mostra que o número de inscricións en cursos de lingua árabe se multiplicou por seis na Universidade Nacional de Australia e case se duplicou nas universidades de Sydney e Melbourne.
Fonte: The Australian
A Universidade de Oviedo acaba de dar un paso moi importante para a dignificación da lingua asturiana na propia institución. Trátase da creación da Comisión da Normalización Lingüística do Asturiano, que vai asesorar o reitor na materia.
Fonte: Asturies.com
A Comunidade de Madrid ofrece este ano cursos gratuítos de formación en lingua inglesa para 4.354 profesores de colexios e institutos públicos e concertados da rexión que participan do programa bilingüe, segundo informou o Goberno rexional.
Fonte: Qué
O secretario xeral de Política Lingüística, Anxo Lorenzo, inaugurou en Ourense o VI Seminario de Dinamización Lingüística no Ensino, “un referente anual para a formación e a divulgación de recursos e ferramentas destinados aos equipos de dinamización da lingua galega”, asegurou.
Fonte: Xunta de Galicia
Os Axóuxeres 2010-2011 despediron a fin de semana pasada unha programación que percorreu as sete cidades e outros doce concellos con música, cantigas, xogos e teatro en galego para os bebés e as súas familias.
Fonte: Xunta de Galicia
A Secretaría Xeral de Política Lingüística levou a cabo en 2010 “un amplo labor de planificación e xestión de programas de dinamización, de formación e de visibilización da lingua galega”. Así o afirmou o responsable do departamento, Anxo Lorenzo, que deu conta no Parlamento das principais iniciativas impulsadas o pasado ano pola secretaría xeral.
Fonte: Xunta de Galicia
O Goberno malaisiano pretende incrementar o número de profesores de mandarín no ensino en todo o país. O primeiro ministro, Najib Razak, indicou que o plan é parte dos esforzos que está a facer o goberno por incidir na preservación da cultura chinesa e recoñecer o programa baseado nos Certificados Unificados de Exames nas escolas de lingua vernácula chinesa.
Fonte: New Straits Times
Unha campaña iniciada en Nova Zelandia demanda que algunhas linguas orixinarias do Pacífico sexan declaradas oficialmente idiomas minoritarios no país insular. Un total de 4.000 persoas asinaron xa a petición dirixida ao parlamento en apoio do niuano, o maorí das Illas Cook, o toquelauano, o samoano e o tongano.
Fonte: Radio New Zealand
Preto de 10.000 alumnos participarán nos cursos de inmersión en lingua inglesa, que inicia a Universidade Internacional Menéndez Pelayo (UIMP) nas súas sedes. Todos os alumnos contan cunha bolsa do Ministerio de Educación para realizar estes cursos, que se desenvolven ata decembro.
Fonte: El Faro Digital
Subscríbase ao boletín
