Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Fundación para o Patrimonio Manés animou a todos os residentes da Illa de Man que poidan falar manés a indicalo no censo de 2011. A pregunta nove do censo consulta aos cidadáns da illa se poden falar, ler ou escribir en manés. As respostas afirmativas servirán de estímulo para que as persoas sigan aprendendo e mellorando os seus coñecementos desta lingua celta.
Fonte: Isle of Man
España atópase á cola de Europa en canto a dominio de inglés. Así o revelan os resultados dun estudo elaborado por Education First (EF) a partir de probas de nivel practicadas a máis de dous millóns de adultos de 42 países e dous territorios.
Fonte: ABC
O ministro do Interior flamengo, Geert Bourgeois, declarou que vivir en Flandres significa adoptar a lingua neerlandesa. Segundo informou, os falantes de francés en Flandres son tamén cidadáns flamengos con "dereitos e deberes"; "poden falar a súa linga no ámbito privado, mais deben falar neerlandés na vida pública, especialmente nos contactos coas autoridades locais, escolas etc.".
Fonte: L'Anglophone
O número de alumnos de lingua catalá no estranxeiro duplicouse desde 2003, ao pasar de 565 nese ano a 1.252 en 2010, segundo informou o Instituto Ramón Llull (IRL).
Fonte: La Vanguardia
As cifran resultan elocuentes porque sete de cada dez nenos que cursaron educación infantil en Euskadi durante o curso 2009-2010 fixérono no modelo D, dominado polas clases en éuscaro. O modelo B foi a segunda opción, cun 24% do alumnado, e só un 4% seguiu os estudos no modelo A, segundo Eustat.
Fonte: Noticias de Gipuzkoa
O Congreso dos Deputados debaterá a posibilidade de reformar o seu Regulamento para garantir “canto antes” o uso do catalán, o éuscaro e o galego, tal como reivindica unha proposición de lei promovida por Esquerra Republicana (ERC) e que leva tamén a sinatura dos nacionalistas de CiU, PNV e BNG, así como de IU-ICV e de Nafarroa-Bai.
Fonte: El Mundo
O Boletín Oficial do País Vasco publicou a orde pola que se establecen as bases do proceso de avaliación externa 'Bikain' (Certificado de Calidade na Xestión Lingüística), e na que se abre o prazo de solicitude deste servizo de avaliación para a edición de 2011, ao que optan 30 organizacións como máximo.
Fonte: Europa Press
O mundo mariño das costas de Galicia chega aos centros educativos da comunidade a través dun documental científico en lingua galega. Trátase d’O mar da fin do mundo. O reino dos cefalópodos, unha produción impulsada pola Secretaría Xeral de Política Lingüística para achegarlles aos escolares contidos curriculares propios das ciencias naturais en galego.
Fonte: Xunta de Galicia
A maxia das palabras e da música en galego centra a oferta de Bocaberta para esta semana. Este programa da Secretaría Xeral de Política Lingüística, que busca dinamizar o uso do galego entre os rapaces e rapazas de 3 a 18 anos, visitará nos próximos días un total de 19 concellos para ofrecerlles aos máis novos actividades adaptadas aos seus intereses.
Fonte: Xunta de Galicia
Vinte e tres membros do Concello de Belfast votaron en contra da sinalización bilingüe en inglés e irlandés ou escocés do Úlster fronte a vinte e un membros que se posicionaron a favor da devandita iniciativa.
Fonte: BBC
Subscríbase ao boletín
