Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A demanda de ensino en valenciano crece entre os alumnos e, tamén, o número deles que quedan sen proseguir os seus estudos na lingua autóctona. O novo curso na educación secundaria obrigatoria (ESO), xunto co bacharelato e a formación profesional (FP), volve destapar a falta de liñas, como veu ocorrendo nos últimos anos nesta comunidade.
Fonte: Levante
As autoridades educativas de Bolivia alertaron sobre o perigo de extinción de linguas nativas e adiantaron que o tema formará parte do contido de futuros programas de ensino.
Fonte: Prensa Latina
O Tribunal Superior de Xustiza de Galicia (TSXG) acordou manter en vigor o Decreto 79/2009 do plurilingüismo que fora solicitado pola Mesa pola Normalización Lingüística. A decisión foi acordada polo órgano xurídico por entender que non existe prexuízo irreparable ao galego coa aplicación do Decreto.
Fonte: Xunta de Galicia
A Comisión de Cultura do Congreso dos Deputados aprobou por unanimidade unha proposición non de lei para instar o Goberno a consignar nos Presupostos Xerais do Estado, a partir de 2011, unha partida específica para a Real Academia Galega (RAG), igual que a que xa perciben estas institucións en Cataluña e o País Vasco.
Fonte: Europa Press
O secretario xeral de Política Lingüística, Anxo Lorenzo, animou os pais e as nais a transmitirlles o galego aos seus fillos para revitalizar o idioma. Fíxoo na estrea dos Obradoiros dos Axóuxeres, unha iniciativa que comezou na Coruña e coa que Política Lingüística busca reforzar a lingua propia de Galicia desde o ámbito familiar.
Fonte: Xunta de Galicia
Xeorxia introduciu clases de inglés obrigatorias nas súas escolas nun intento do seu Goberno pro-occidental por desvincular o país da esfera xeopolítica da veciña Rusia.
Fonte: Telegraph
Tan só o 7 % dos ucraínos coloca a situación do ruso na lista dos 25 problemas principais que máis lle afectan, segundo as enquisas realizadas en 2008 e 2009. O autor destas, o experto en política Oleh Medvedev, afirma que as enquisas están baseadas en investigacións sociolóxicas e en estatísticas de entidades e institucións públicas, ONG e sindicatos, así como nas valoracións de expertos.
Fonte: ZIK
O catalán está situado como a décima lingua en tradución, a oitava na blogosfera e a vixésima en edición no mundo. Estes son algúns dos datos que se desprenden do balance da Secretaría de Política Lingüística 2004-2010 que presentou o vicepresidente do Goberno catalán, Josep Lluís Carod-Rovira.
Fonte: Avui
A comisaria europea de Educación, Cultura, Plurilingüismo e Xuventude, Androulla Vassiliou, amosouse “plenamente satisfeita” pola política lingüística que está a desenvolver a Xunta de Galicia. Así llelo trasladou ao conselleiro de Educación e Ordenación Universitaria, Xesús Vázquez, e ao secretario xeral de Política Lingüística, Anxo Lorenzo, durante a reunión que mantiveron en Bruxelas.
Fonte: Xunta de Galicia
A Generalitat de Catalunya aprobou un decreto co que flexibiliza a acreditación do coñecemento do catalán para o profesorado universitario, deixando marxe aos centros para certificar a competencia lingüística ata de cinco maneiras diferentes.
Fonte: ADN
Subscríbase ao boletín
