O Concello de Bilbao abriu o prazo de inscrición para a XXXVII edición do Concurso de Contos en Éuscaro Rafael Mikoleta, dirixido a escolares de 8 a 16 anos. O certame busca homenaxear o autor da primeira gramática vasca e fomentar a lectura e escritura nesta lingua entre a mocidade bilbaína. Os contos deben ser orixinais, escritos en éuscaro, ilustrados e presentados antes do 31 de xaneiro de 2025.

O conselleiro de Cultura, Lingua e Xuventude, José López Campos, defendeu a “relevante contribución” dos certames literarios en galego para “prestixiar a nosa lingua o que, consecuentemente, acaba repercutindo nun maior uso social”. Así o destacou na entrega na Coruña do XIII Premio Narrativa Breve Repsol a Alberto Ramos pola obra Pirotecnia, nun acto no que estivo acompañado pola delegada territorial da Xunta, Belén do Campo, e polo secretario xeral da Lingua, Valentín García.

O Goberno de Islandia quere que a poboación migrante residente no país aprenda a lingua vernácula. Varias empresas e institucións públicas ofrecen cursos de islandés durante o horario laboral.

Fonte: Times of Malta

O Consorci per a la Normalització Lingüística abre en decembro o período de inscricións para os novos cursos trimestrais de catalán, dispoñibles entre os niveis A1 e C1, con máis de 32 000 prazas ofertadas, maioritariamente en modalidade presencial. Os niveis inicial e básico son gratuítos e teñen prioridade para persoas con poucos coñecementos da lingua.