Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A cidade da Coruña acolleu o inicio da nova edición dos Axóuxeres, unha iniciativa da Secretaría Xeral de Política Lingüística que, mediante a música, os xogos, as cantigas e as palabras, busca favorecer a incorporación do galego á comunicación entre as familias e os bebés.
Fonte: Xunta de Galicia
Só o 33 % dos diplomáticos canadenses ten as competencias en lingua estranxeira necesarias para realizar o seu traballo, segundo amosan as estatísticas recentes. A Auditora Xeral Sheila Fraser reprendeu o Goberno federal en 2007 ao coñecer que só o 16 % dos 180 funcionarios do servizo exterior que debía ter coñecementos avanzados da lingua estranxeira para o seu posto era capaz de falar a lingua en cuestión.
Fonte: Toronto Sun
Informes realizados recentemente mostran que o número de alumnos do Reino Unido que estuda unha segunda lingua alcanzou un novo mínimo. Algúns expertos culpan a decisión do Partido Laborista de facer optativas as linguas por primeira vez en 2004, o que permite que milleiros de alumnos abandonen estas materias aos 14 anos.
Fonte: PRWeb
A concelleira de Mocidade, Solidariedade e Normalización Lingüística do Concello da Coruña, Ermitas Valencia, presentou o programa de actividades do Servizo de Normalización Lingüística, que inclúe obradoiros de integración cultural e lingüística para inmigrantes e emigrantes retornados.
Fonte: Galicia Hoxe
O Goberno vasco abrirá nos próximos meses unha nova convocatoria para dar a máis centros educativos a oportunidade de experimentar o novo modelo trilingüe, que utiliza o castelán, o éuscaro e o inglés como linguas instrumentais para impartir as ensinanzas.
Fonte: Diario Vasco
A Secretaría Xeral de Política Lingüística vén de anunciar a convocatoria para a presentación de proxectos de fomento do uso do galego nos centros de ensino público de Galicia para o curso escolar 2010-2011, promovidos polos equipos de dinamización da lingua galega.
Fonte: Xunta de Galicia
O poderío económico e o lingüístico, aínda que a priori non o pareza, están intimamente relacionados. Hai linguas que fala pouca xente relativamente pero que teñen gran peso internacional porque os que a dominan son ricos.
Fonte: El Economista
O Instituto Rosalía de Castro, situado en Santiago de Compostela, ofreceralle este próximo curso ao seu alumnado docencia de nove idiomas, que se complementará con materias sobre as respectivas culturas.
Fonte: La Voz de Galicia
Un total de 35 sentenzas en contra arrastra o Goberno valenciano sobre o intento constante de eliminar a denominación do catalán en referencia á lingua dos valencianos. O Tribunal Superior de Xustiza (TSJ) da Comunidade sempre ditaminou que entra dentro da legalidade e non atenta contra o Estatuto de Autonomía a cualificación do catalán en referencia ao valenciano.
Fonte: Levante
O director xeral de Centros e Recursos Humanos da Consellería de Educación e Ordenación Universitaria da Xunta de Galicia, José Manuel Pinal, recordou que os docentes galegos deberán cumprir “coa legalidade vixente e aplicar o novo decreto do plurilingüismo”.
Fonte: Xunta de Galicia
Subscríbase ao boletín
