Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Unha trintena de entidades cívicas e educativas promove accións conxuntas a favor da escola catalá. A macroasociación xa redactou un manifesto no que salienta a importancia cultural, lingüística e social do catalán como lingua vehicular no ensino.
Fonte: Avui
‘Batería de avaliación da competencia na linguaxe escrita en galego e castelán’ é o nome do proxecto impulsado polo grupo de investigación Optimización das Linguaxes Múltiples da Universidade de Santiago de Compostela, que acaba de presentar as ferramentas para avaliar e detectar as competencias lingüísticas dos escolares de educación primaria.
O Concello de Narón pon en marcha o programa As palabras do galego, no que invitan os veciños a enviar ao Servizo de Normalización Lingüística a palabra que consideren máis curiosa.
Fonte: La Voz de Galicia
Microsoft lanzou o sistema operativo Windows 7 en suahili co obxectivo de que máis de 150 millóns de falantes desta lingua, tanto en Kenya como noutros países de África, poidan ter acceso a unha gama máis ampla dos seus produtos informáticos na súa lingua.
Fonte: Mwakilishi.com
O Concello de Bilbao impulsa o uso do éuscaro fóra dos centros escolares con obradoiros impartidos por varios dos xogadores e xogadoras do Athletic Club.
Fonte: El Mundo
O sábado 26 de febreiro realizarase en Tapia a primeira proba de coñecemento de galego-asturiano. A Academia da Lingua Asturiana responde así ao interese da cidadanía da zona pola celebración deste exame escrito e oral.
Fonte: Asturies
O Consello de Ministros da Unión Europea aprobou a creación dun novo sistema de patentes unificado que simplifica o réxime lingüístico para reducir custos e limítao só a tres linguas: inglés, francés e alemán. A decisión adoptouse por maioría cualificada, cos únicos votos en contra de España e Italia, que consideran as súas linguas discriminadas inxustamente.
Fonte: El Periódico
O director do Instituto Castelán e Leonés da Lingua, Gonzalo Santonja, e o reitor da Universidade de Burgos, Alfonso Murillo, asinaron un convenio de colaboración para a creación dunha bolsa de emprego destinada a profesores de español para estranxeiros.
Fonte: Europa Press
Expertos chegados de todos os puntos do territorio federal de Nunavut (Canadá) reuníronse en Iqaluit para debater acerca do espiñoso problema ao que lingüistas e educadores se levan enfrontado durante máis de medio século: como crear unha norma da lingua inuit que poida ser comprendida en todas as rexións do territorio.
Fonte: The Vancouver Sun
As autoridades chinesas prevén a posta en marcha do primeiro exame de nivel para certos estudantes e traballadores da lingua da etnia zhuang, a segunda maior do país tras os Han. A Comisión Estatal de Asuntos Étnicos afirmou que a medida ten por obxecto promover o uso desta lingua que, a diferenza doutras linguas de grupos étnicos minoritarios, segue a ser de uso corrente e estendido.
Fonte: People's Daily Online
Subscríbase ao boletín
