Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno vasco porá en marcha no curso 2011-2012 o proceso para conceder titulacións homologadas de éuscaro aos alumnos do "modelo D", é dicir, aqueles que estudan integramente nesta lingua, sen necesidade de que se sometan a exames específicos para as acreditacións oficiais de coñecemento do éuscaro.
Fonte: eitb
Dous investigadores do Departamento de Educación Especial da Universidade de Haifa desenvolveron un estudo que mostra que os alumnos que coñecen dúas linguas teñen máis facilidades para acadaren o dominio dunha terceira cás persoas monolingües.
Fonte: OneIndia
Representantes de Escola Valenciana e da Consellería de Educación reuníronse por primeira vez en dous anos para falar sobre o modelo plurilingüe de ensino na Comunidade Valenciana, segundo informou a asociación nun comunicado.
Fonte: ABC
Ata 40.000 persoas se inscribiron nalgún dos cursos de catalán que organizou o Consorcio para a Normalización Lingüística de Barcelona durante o ano 2010. A gran maioría, un 72 %, son persoas de orixe estranxeira.
Fonte: Avui
Galeguizargalicia.tv, a canle creada recentemente polos grupos que integran galeguizargalicia.com, ten como obxectivo difundir vídeos das súas actividades a favor da lingua galega.
Fonte: galeguizargalicia.tv
O ministro cimbabués de Educación, David Coltart, defendeu a necesidade de contar con profesores que sexan competentes nas linguas locais sesotho, venda, kalanga e ndebele nas rexións Matabeleland. "Os alumnos deben poder aprender na lingua que os seus pais falan con eles, xa que constitúe a base da súa aprendizaxe. Se non lles dan esa oportunidade, a súa educación verase prexudicada", afirmou.
Fonte: News Day
O futuro do español está garantido, sobre todo nos Estados Unidos. Así o manifestou o lingüista e secretario xeral da Asociación de Academias da Lingua Española, Humberto López Morales, ao afirmar que esta é “hoxe a cuarta lingua máis falada do planeta” e “é moi posible que en tres ou catro xeracións o 10 por cento da poboación mundial se entenda en español”.
Fonte: Levante-emv.com
Bocaberta, o programa de dinamización do galego que promove a Secretaría Xeral de Política Lingüística para rapaces e rapazas de 3 a 18 anos, visitará nos próximos días 28 localidades das catro provincias galegas.
Fonte: Xunta de Galicia
O escritor Miguel Rojo, que presenta en Valladolid a súa última novela, A folla do ginkgo biloba, asegurou a Efe que a lingua asturiana "se atopa na UVI e en estado de coma”, ao non gozar da “protección suficiente”.
Fonte: ABC
O Goberno vasco e a Oficina Pública da Lingua Vasca francesa firmaron un acordo de colaboración en materia de éuscaro co obxectivo de potenciar o número de falantes de vasco no País Vasco francés.
Fonte: ABC
Subscríbase ao boletín
