Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Secretaría Xeral de Política Lingüística presentou o primeiro curso en liña orientado á preparación das probas de certificación de lingua galega no nivel 1. Trátase do inicio da posta en marcha dun ambicioso sistema de formación a través dunha plataforma virtual que ten como obxectivo potenciar a aprendizaxe do galego.
Fonte: Xunta de Galicia
A Comisión de Educación e Cultura do Parlamento balear aprobou tres proposicións non de lei que permitirán a aplicación da Lei de normalización lingüística nos ámbitos deportivo, sanitario privado e empresarial.
Fonte: Europa Press
O Día da Lingua Rusa celebrouse na sede das Nacións Unidas en Nova York o martes 8 de xuño. Esta celebración realízase no marco do programa de apoio e desenvolvemento do plurilingüismo e a diversidade cultural.
Fonte: ITAR-TASS
O sábado 19 de xuño en todos os Institutos Cervantes que existen salpicados a nivel mundial vaise celebrar o Día do Español.
Fonte: Empresa Exterior
O grupo editorial Impresa, o maior de Portugal, comeza a aplicar o acordo ortográfico da lingua portuguesa, que unifica as diferenzas existentes entre a variante europea da lingua e a brasileira.
Fonte: Terra
A Consellería de Educación, responsable da área de Política Lingüística da Generalitat Valenciana, recortou este ano o 46 % das subvencións destinadas ás asociacións cívicas e os comercios que realicen actividades de promoción do uso do valenciano.
Fonte: Levante
O Goberno do Estado de Michoacán está a deseñar estratexias para preservar o nahua, o mazahua, o otomí e o purépecha e para tal efecto está desenvolvendo o proxecto de creación dunha institución que preserve, fortaleza e desenvolva as linguas indíxenas.
Fonte: Mi Morelia
GalegoLab é un colectivo creado para sumar esforzos e vontades en defensa do idioma galego, un laboratorio para crear e desenvolver accións positivas a prol da lingua, principalmente centradas nas culturas emerxentes e nos sectores máis novos da sociedade.
Fonte: CTNL
O Goberno vasco dedicará 12.690.000 euros, 410.000 euros menos que no exercicio anterior, a promover e fomentar o uso do éuscaro en empresas públicas e privadas, nas asociacións e nas distintas institucións municipais de Euskadi.
Fonte: El Correo
A minoría s'aoch de Cambodia conta para salvar a súa lingua con dez anciáns depositarios da herdanza cultural, porque a xuventude está interesada en escapar da marxinación e parecerse a calquera outra persoa nova da maioría xemer.
Fonte: ABC
Subscríbase ao boletín
