Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Un total de catro de cada dez parellas de orixe castelanfalante fálalles en catalán con tanta ou máis intensidade ca en castelán aos seus fillos, segundo o estudo Llengua i joves. Usos i percepcions lingüístics de la joventut catalana (Lingua e mocidade. Usos e percepcións lingüísticas da xuventude catalá.
Fonte: Avui
Un total de 35 alumnos e alumnas que cursa estudos de lingua e cultura galegas en Cataluña está visitando Galicia no marco do proxecto Galauda, un programa de aprendizaxe de galego do que forman parte nos seus centros de ensino.
Fonte: Xunta de Galicia
A matriculación na materia de Lingua Asturiana incrementouse nos últimos dez anos nuns 9.700 alumnos segundo informou o conselleiro de Educación, José Luis Iglesias Riopedre, quen engadiu que o profesorado desta materia aumentou nun 63 por cento no mesmo período.
Fonte: La Nueva España
Cultura promoverá o éuscaro a través das actividades que se desenvolverán en paralelo á celebración dos próximos cursos de verán da Universidade do País Vasco (UPV).
Fonte: El País
Apoiar o traballo de alumnos e profesores no marco do Espazo Europeo de Educación Superior ao mesmo tempo que se fomenta a docencia en galego é o obxectivo principal das doce novas unidades didácticas que presentou a Universidade de Santiago de Compostela.
Fonte: La Voz de Galicia
Unha enquisa realizada pola empresa de recursos humanos Adecco sobre os idiomas máis valorados polo mercado laboral sinala que para o 100% dos empregados o inglés é o idioma máis apreciado; seguido do alemán, elixido polo 47%; do francés, polo 33,6%; e do chinés, polo 18%. Porén, as valoracións cambian cando se lles pregunta polos dous idiomas do futuro. O inglés segue sendo o máis valorado, polo 92,2% dos enquisados, pero o chinés ascende ata o segundo lugar para o 69,5%.
A CNSE para a Supresión das Barreiras de Comunicación e a Fundación Carrefour presentaron un novo dicionario infantil bilingüe de lingua de signos española e lingua española. Baixo o título Descubre nuevos signos, ambas as entidades teñen como obxectivo acercar a lingua de signos aos menores, tanto xordos como oíntes, de entre tres e oito anos de idade.
Fonte: Europa Press
A lingua portuguesa vai ser celebrada na sede da Organización das Nacións Unidas para a Educación, a Ciencia e a Cultura (Unesco), en París.
Fonte: Jornal Digital
A Secretaría Xeral de Política Lingüística da Xunta de Galicia continúa o seu labor de proxección exterior da lingua e da cultura galegas a través dos centros de estudos galegos, que desenvolven a súa actividade en máis de corenta universidades de todo o mundo.
Fonte: Xunta de Galicia
Tan só para acceder ao 1 % dos postos de traballo da Administración foral de Navarra é preceptivo o coñecemento do éuscaro. Hai outras prazas no Goberno nas que o éuscaro conta como mérito, pero este só representa o 1 ou 2 % do total.
Fonte: Noticias de Navarra
Subscríbase ao boletín
