Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A xustiza valenciana fala xa 60 idiomas, os que manexan os intérpretes xudiciais ao servizo da Generalitat. Cada ano aumenta o seu traballo e en 2009 houbo máis de 17000 traducións en linguas de lugares como Paraguai, Tanzania, Irán, Mali ou Bangladesh.
Fonte: Las Provincias
A ministra de Educación de Portugal anunciou o adiamento da entrada en vigor do acordo ortográfico nas escolas para o ano académico 2011-2012 e incluso afirmou que non ve a necesidade de investir na formación de profesores para esta adaptación.
Fonte: Jornal da Madeira
A Secretaría Xeral de Política Lingüística pon en marcha os cursos preparatorios deste ano para obter o Certificado de lingua galega (Celga). O departamento que dirixe Anxo Lorenzo ofertará un total de 185 cursos –cunha duración de 75 horas lectivas cada un– que se distribuirán en tres quendas ao longo de todo o ano, co fin de facilitarlles a asistencia a todas as persoas interesadas en participar neles.
Fonte: Xunta de Galicia
A proposta da lei de linguas galesa que lles outorgará o dereito aos falantes de galés de recibir servizos nesta lingua publicouse o 4 de marzo. Esta proposta cumprirá os tres compromisos da coalición One Wales para confirmar o status oficial do galés, os dereitos na prestación de servizos e o establecemento do cargo de comisario da lingua.
Fonte: Welsh Assembly Government
O presidente de Unión Democrática Ceutí (UDCE), Mohamed Alí, sinalou que o estatuto ten que reflectir "que o castelán é a lingua oficial da Comunidade Autónoma de Ceuta, pero por razóns histórico-sociais a lingua árabe (árabe ceutí) debe gozar dunha especial protección, sen que iso sexa óbice para o recoñecemento do resto de sensibilidades e realidades lingüísticas que conforman a nosa diversidade cultural".
Fonte: ABC
O delegado do Goberno catalán, Jordi Martinoy, e o director xeral de Andalus, Fernando Guerrero, asinan un convenio que permitirá dispoñer en catalán do web da compañía e das mensaxes de cabina, entre outras cousas.
Fonte: Generalitat de Catalunya
Os 43.000 comerciantes galegos terán plena liberdade para elixir en cal dos dous idiomas oficiais da comunidade queren rotular os seus establecementos. Así o establece o anteproxecto da Lei de comercio que a Xunta presentou como unha norma coa que pretende buscar o equilibrio entre a protección do consumidor e do pequeno e mediano comercio, dentro dun escenario que está marcado pola liberalización europea do sector.
Fonte: La Voz de Galicia
A Fundación Carlos Casares e a Escola Superior de Arte Dramática (ESAD) poñen en marcha Proxecto Toromelos, unha iniciativa de promoción do teatro para a infancia e a mocidade. O proxecto foi presentado na escola viguesa e contou coa presenza de Anxo Lorenzo, secretario xeral de Política Lingüística da Consellería de Educación, que patrocina este programa dirixido aos escolares de toda Galicia.
Fonte: La Voz de Galicia
Os cidadáns invidentes terán a man 185.000 papeletas en sistema braille para exercer o seu dereito a voto este 14 de marzo en Colombia.
Fonte: El Colombiano
O esperanto, lingua creada a finais do XIX co soño de facilitar o entendemento no Babel mundial, non parece cerca de conseguir a súa meta máis dun século despois, pero sorprende a súa popularidade en China, onde se atopa a maior comunidade de falantes do idioma e este conta con apoio oficial.
Fonte: Norte de Castilla
Subscríbase ao boletín
