Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O presidente da Xunta, Alberto Núñez Feijoo, anunciou que antes de quince días se fará unha consulta a todos os pais e nais de alumnos na que se lles formularán varias cuestións e se lles pedirá opinión «sobre o bilingüismo» e sobre «o peso» que ambos os idiomas, o galego e o castelán, deben ter na educación en Galicia.
Fonte: La Voz de Galicia
O 26 de maio lanzouse unha nova web para que os cidadáns dos 27 Estados membro da Unión Europea falen e lean sobre os mesmos temas, algo que ata o de agora se viu dificultado polas barreiras lingüísticas.
Fonte: EUObserver
Incrementar nun 3 % (do 48 % ao 51 %) as matriculacións escolares en modelos de éuscaro para o ano 2012 é unha das metas do Plan estratéxico de Euskarabidea (2009-2012), cuxo borrador se presenta ante o Consello Navarro do Éuscaro. Este documento recolle así mesmo aumentar un 115 % a dotación económica para prestixiar o éuscaro e facelo atractivo.
Fonte: Noticias de Navarra
Os concellos de Buruntzaldea (Andoain, Astigarraga, Hernani, Lasarte-Oria, Urnieta eta Usurbil) asinaron en 2002 un convenio para traballar conxuntamente programas de éuscaro. En base a ese convenio, encóntrase o programa Proposta para a mellora da situación do éuscaro despois do Ensino Secundario Obrigatorio de 2008-2009.
Fonte: Diario Vasco
Os tradutores automáticos da web gencat da Generalitat catalá atenderon oito millóns de peticións en 2008, un número de consultas que pon de relevo a aposta da Secretaría de Política Lingüística para facilitar o coñecemento e o uso do catalán, segundo o seu secretario, Bernat Joan.
Fonte: ADN
A posibilidade de interpretar as valiosas ensinanzas dos clásicos da literatura chinesa podería perderse se non se retorna aos caracteres tradicionais.
Fonte: La Gran Época
O embaixador de China en Cuba, Zhao Rongxian, anunciou a próxima apertura dunha cátedra de estudos dese idioma na illa. O diplomático precisou que o proxecto forma parte dos intercambios culturais entre ambos os países, con especialistas no ensino para estranxeiros.
Fonte: Granma
O Tribunal Constitucional decidiu que a lei que define o coreano estándar como a lingua usada en Seúl é constitucional. Promulgada en 1988, un artigo da Lei da lingua coreana establece que o coreano estándar é "só a lingua falada polas persoas cultas de Seúl".
Fonte: The Korea Times
Mancomún desenvolveu o separador silábico para o galego Hyphenation-gl, o glosario galego de localización de software e o script Tmx2po, que permite converter memorias de tradución en formato .tmx ao formato .po.
Fonte: Sociedade da Información
Boletín
Subscríbase ao boletín
