Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Servizo de Normalización Lingüística de Carballo lanza novos obradoiros de acollemento lingüístico para persoas de fóra de Galicia, así como cursos preparatorios das probas Celga 2, 3 e 4. O obradoiro de acollemento desenvolverase entre setembro e decembro e vai destinado a persoas de fóra de Galicia.
Fonte: Concello de Carballo
Avilés converterase na capital da reivindicación do asturiano coa chegada da Xira pola Oficialidade, unha campaña que busca concienciar sobre a importancia de protexer as linguas propias e mobilizar a sociedade para acadar a súa oficialidade e que incluirá diversas actividades culturais e documentais entre o 2 e o 6 de setembro.
A Federación de Asociacións de Persoas Xordas de Galicia (FAXPG) comezará nas próximas semanas varios cursos de lingua de signos española en Vigo e outras cidades galegas. A FAXPG, con trinta anos de experiencia na formación nesta lingua, ofrece clases impartidas por profesorado xordo nativo.
A Consellería de Educación das Illas Baleares destinará algo máis dun millón de euros ao plan piloto de libre elección de lingua para o curso 2024/2025, distribuído nos once centros educativos adheridos ao plan. Con esta iniciativa preténdese reforzar a competencia nas dúas linguas oficiais. Será avaliado mediante probas de diagnóstico ao comezo e ao final do curso, e estenderase durante tres anos.
A Dirección Xeral do Libro, Arquivos e Bibliotecas de Portugal vai destinar 75 mil euros á edición de 45 obras de autores en lingua portuguesa no Brasil. Os títulos serán de autores portugueses e africanos.
Fonte: Público
O Departamento de Educación de Escocia agasallaralles un xogo de Scrabble en gaélico a todas as escolas das illas Hébridas Exteriores de Escocia. A iniciativa busca animar o alumnado das escolas a aprender ou mellorar gaélico dun xeito lúdico.
Fonte: The National
O Goberno da Rioxa e o Instituto Cervantes destinarán 5,1 millóns de euros nos próximos catro anos ao Observatorio Global do Español, un organismo destinado a analizar a situación do español no mundo. O convenio, que establece a súa creación e funcionamento, inclúe financiamento por parte do Instituto Cervantes e a Fundación para a Transformación da Rioxa, así como a provisión de persoal e instalacións tanto en San Millán de la Cogolla como en Alcalá de Henares.
Entre o 30 de agosto e o 1 de setembro de 2024, a aldea do Couto en Ponteceso acollerá a 42ª edición do Festiletras, organizado pola Fundación Eduardo Pondal e que ten como lema «Unha lingua para poder amar a mares!».
Fonte: Consello da Cultura Galega
O secretario de Estado das Comunidades Portuguesas, José Cesário, declarou en Macau que o ensino da lingua portuguesa debe estenderse aos países que aínda non contan con oferta, como Dinamarca, Noruega ou os Emiratos Árabes Unidos, e que son destino de novos fluxos migratorios.
Fonte: Contacto
Co fin de atender a diversidade lingüística da India, a compañía aérea Air India incorporou sete novas linguas rexionais aos seus servizos de atención ao cliente.
Fonte: Travel Biz Monitor
Subscríbase ao boletín
