A Obra Cultural Balear  reclama que se aborde o impacto do turismo na sostibilidade lingüística das Illas Baleares. Co apoio de diversas entidades e personalidades, demandan que a perspectiva lingüística se incorpore ao pacto social e político para a sostibilidade do Goberno do arquipélago, xa que sinalan que, sen esta consideración, a situación crítica da lingua e a cultura locais podería agravarse.

O Servizo de Garantía dos Dereitos Lingüísticos e o Ararteko asinaron un acordo ata 2028 para protexer os dereitos lingüísticos da cidadanía. O convenio baséase na coordinación, a eficacia e a colaboración, e inclúe a remisión semestral de queixas sobre discriminacións lingüísticas. Tamén se organizarán actividades de promoción e concienciación sobre estes dereitos.

A Xunta de Galicia convoca os Premios da Cultura Galega 2024, certame que recoñece o labor creativo e a súa expansión nos novos espazos actuais desde a súa primeira edición, en setembro de 2010. As oito modalidades convocadas son as de Letras, Artes Visuais, Artes Escénicas, Música, Audiovisual, Lingua, Patrimonio Cultural e Proxección Exterior.

Despois da pandemia da Covid-19, a lingua córnica ten experimentado un importante ascenso en popularidade. Alén do confinamento, este incremento tamén se debe ao éxito da artista galesa Gwenno que emprega a lingua córnica case exclusivamente en todas as súas cancións.

Fonte: The Guardian