Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Museo da Lingua Portuguesa de São Paulo, Brasil, publicou unha convocatoria para seleccionar persoas interesadas no estudo de linguas de orixe africana. As persoas seleccionadas recibirán unha bolsa de estudo para desenvolver as súas investigacións.
Fonte: Museo da Lingua Portuguesa
Con motivo do Día de San David, patrón do País de Gales, o ministro de Educación e Lingua Galesa lanzou o proxecto Embaixadores Culturais co que pretende promover o uso da lingua e cultura galesas. Un dos piares do programa vai ser promocionar o uso e coñecemento do galés por parte de persoas de fóra que chegan e deciden residir no país.
En total, destinarase un millón de euros a 22 proxectos de empresas do sector da intelixencia artificial e as tecnoloxías da linguaxe. O anuncio realizouse no acto de presentación de Aina Challenge, o primeiro concurso de proxectos de IA en catalán.
Fonte: Generalitat de Catalunya
Ao longo do mes de marzo porase en marcha a décima edición da iniciativa «Euskara, sari zihurra» que ten como obxectivo impulsar o uso do éuscaro no comercio local.
Fonte: Noticias de Álava
Máis de 800 estudantes dos institutos de Chapela, Pedro Floriani e Mendiño participan na iniciativa «Unha semaniña enteira» pola que se comprometen a falar galego en todos os contextos da súa vida.
Fonte: Faro de Vigo
A Escola Galega de Administración Pública publica a convocatoria de actividades formativas, entre as que figuran as de carácter lingüístico cos seguintes cursos: “A normativa do galego estándar: actualización gramatical, ortográfica e léxica”, “A calidade da redacción administrativa. Técnicas para unha boa redacción dos documentos administrativos” e “Redacción de documentos técnico-xurídicos en galego”.
A Semana da Lingua Irlandesa, Seachtain na Gaeilge, é o maior festival irlandés do mundo e este ano durará máis tempo. Multitude de eventos en varios países celebrarán a importancia e necesidade de incrementar o uso diario desta lingua celta.
Fonte: Irish Central
O Goberno de Escocia recortará 354 000 libras esterlinas á promoción do gaélico escocés nos medios públicos de comunicación como MG Alba e BBC Alba. Esta medida supón un duro golpe para a supervivencia da lingua vernácula.
Fonte: Scotsman
O concurso escolar da Xunta de Galicia para a elaboración da exposición sobre Luísa Villalta, autora homenaxeada o Día das Letras Galegas 2024, xa ten gañadores: o Colexio CEIP Raquel Camacho, da Coruña, e o Centro Integrado de FP CIFP A Carballeira-Marcos Valcárcel, de Ourense.
Fonte: Xunta de Galicia
O concello zaragozano de Mequinenza reuniu máis de 300 persoas das tres provincias nun acto para defender o uso do aragonés e o catalán de Aragón como linguas propias.
Fonte: El Nacional
Subscríbase ao boletín
