Activistas tibetanos alertaron que o goberno chinés prohibiu o ensino da lingua tibetana nas escolas da provincia chinesa de Sichuan. Isto podería pór en risco a supervivencia da lingua en toda a rexión.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
18 de outubro de 2023
Un acto institucional marcou a inauguración da Universidade de Linguas Indíxenas de México (ULIM, polas súas siglas en español) que permitirá recoñecer os dereitos lingüísticos dos pobos orixinarios e das súas comunidades.
Fonte: Gobierno de México
18 de outubro de 2023
Esta é a relación de galardoados nos Premios da Cultura Galega 2023: «Ponte ...nas Ondas!», na categoría de Lingua; os cursos de verán «Galego sen Fronteiras», na categoría de Proxección Exterior; Yolanda Castaño, na categoría de Letras; o Museo do Gravado á Estampa Dixital, na categoría de Artes Visuais; PistaCatro, na categoría de Artes Escénicas; a banda de música Unión de Guláns, na categoría de Música; Portocabo, na categoría Audiovisual; e Eduardo Pardo de Guevara, na categoría de Patrimonio Cultural.
18 de outubro de 2023
Os establecementos comerciais e hostaleiros poderán solicitar subvencións para diferentes actuacións (web, publicidade, rótulos, bolsas, tarxetas etc.), así como pedir axuda para realizar traducións ou correccións de textos breves.
Fonte: El Diario Vasco
18 de outubro de 2023
O Hotel Acouga de Celanova caracterízase pola súa implicación coa divulgación da historia patrimonial e cultural da vila. Proba disto, é a creación do Premio de Poesía Acouga Casa dos Poetas, ao que deberán presentarse textos escritos en lingua galega.
Fonte: La Voz de Galicia
18 de outubro de 2023
O Curso de Habilidades Comunicativas está dirixido ao alumnado que vai redactar ou defender en galego traballos académicos de curso, de fin de grao, de fin de mestrado ou teses.
Fonte: Consello da Cultura Galega
18 de outubro de 2023
Esta moción insta o Goberno balear, entre outras cuestións, a darlle prioridade ao catalán, como lingua propia do arquipélago, nas institucións públicas.
Fonte: La Vanguardia
17 de outubro de 2023
Con motivo do balance do seguimento das cen medidas de promoción do catalán, anunciáronse as novidades, que afectan aos ámbitos do videoxogo, cunha convocatoria de subvencións, e o audiovisual, coa celebración dunhas xornadas de recoñecemento ao sector, así como unha actualización do espazo de aprendizaxe Parla.cat.
Fonte: Generalitat de Catalunya
17 de outubro de 2023
Nos últimos tres anos producíronse varias sentenzas xudiciais contrarias a convocatorias públicas de emprego polas esixencias de éuscaro. Así mesmo, o Tribunal Constitucional anulou un artigo da Lei vasca de institucións locais no que se avoga polo uso preferente desta lingua na documentación dos concellos.
17 de outubro de 2023
Membros da corporación municipal de Ribeira e da Mesa pola Normalización Lingüística mantiveron unha reunión para realizar unha posta en común das necesidades e posibles vías de colaboración para a promoción do galego.
Fonte: Diario de Arousa
Boletín
Subscríbase ao boletín
