Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
«Dieta e saúde alimentaria» é o título da nova entrega de Proxector, que ofrece unha ducia de vídeos nos que se explica que produtos son beneficiosos para o ser humano, así como as consecuencias do abuso de certos alimentos para a saúde.
Fonte: Consello da Cultura Galega
Os Premios Galegos da Regueifa Espalla Rimas 2024 celébranse o 13 de xaneiro, convocados polo grupo La Voz de Galicia en colaboración con varias entidades, nun acto no que se xuntarán mestres e mestras da improvisación oral en galego.
Fonte: Consello da Cultura Galega
Segundo a Enquisa á Xuventude de Cataluña 2022, o 25,1 % da mocidade de entre 15 e 34 anos usa o catalán de forma habitual e o 14,1 % fala catalán na casa, pero castelán no seu día a día.
Fonte: El Periódico
O Diario Oficial de Galicia publica as bases das novas edicións dos tres premios de literatura dramática que a Xunta de Galicia convoca con periodicidade bienal: XXVII Álvaro Cunqueiro para textos teatrais, XIII Manuel María de literatura dramática infantil e XVI Barriga Verde de textos para teatro de monicreques nas súas modalidades de público infantil e adulto.
Varios organismos que defenden o gaélico irlandés na cidade de Cork solicitaron ao municipio que elabore unha estratexia que promova o uso da lingua vernácula no ámbito local.
Fonte: Echo Live
O condado galés de Ceredigion acaba de estrear o proxecto "Benvido/a a Ceredigion" para concienciar as persoas que se afincaron no condado a se integraren por medio da lingua galesa.
Fonte: Cambrian News
O xulgado contencioso administrativo n.º 3 de Donostia anulou por consideralas discriminatorias as bases dunha convocatoria para dúas prazas de policía municipal na cidade porque se esixía o coñecemento do éuscaro, en concreto, un perfil B2 desta lingua.
Fonte: La Vanguardia
O Calendario científico escolar 2024 é unha ferramenta destinada a achegar a cultura científica á xente nova e crear referentes inspiradores. Está dispoñible en liña en once linguas, xunto con recursos didácticos que o completan.
Fonte: Consello da Cultura Galega
A Generalitat estableceu un convenio de colaboración coa Federación de Autoescolas de Cataluña co obxectivo de promover o uso do catalán na formación e nos exames do permiso de conducir. Así, elaboraranse nesta lingua 75 cuestionarios de 30 preguntas tipo test en formato web interactivo, dos que xa se publicaron 25.
Fonte: El Periódico
Esta web está destinada á difusión da vida e da obra de Luísa Villalta, autora homenaxeada en 2024 co Día das Letras Galegas.
Fonte: Real Academia Galega
Subscríbase ao boletín
